Elimizdegi tótenshe jaǵdaı rejıminde tilsiz jaý – qaterli indetpen belsenip kúresip júrgen toptyń biri – eriktiler. Búginde Batys Qazaqstan oblysynyń volunteer07.kz saıtyna 8955 adam tirkelgen. Olar qazir negizgi 3 baǵyt boıynsha jumys istep jatyr.
- Biz alǵashqy kúnnen-aq Uly Otan soǵysy ardagerlerine, jalǵyzbasty qarııalarǵa, múmkindigi shekteýli jandarǵa, kóp balaly ata-analarǵa azyq-túlik, dári-dármek jáne ózge de qajetti ónimderdi jetkizýge járdemdesip jatyrmyz, - deıdi Batys Qazaqstan oblystyq jastar saıasaty máseleleri basqarmasy basshysynyń mindetin atqarýshy Nurhat Orash.
Qazirgi tańda aqjaıyqtyq volonterler 437 otbasyǵa kómek kórsetken. «Bul jumysty toqtatpaı, jalǵastyra beremiz» deıdi eriktiler.
Volonterlerdiń kómegimen qolǵa alynǵan taǵy bir bastama - birneshe márte qoldanýǵa arnalǵan betperde tigý isi. Osylaısha bir aptada jergilikti eriktiler 4000-nan astam betperde tigip, oblys turǵyndaryna tegin taratqan.
Árıne, syn sátte memleket tarapynan keshendi sharalar uıymdastyrylyp, turǵyndarǵa barynsha qolaý kórsetilýde. Máselen, áleýmettik mańyzy bar azyq-túlik baǵasy qatań qadaǵalanýda. Alaıda taýar qunyn negizsiz ósirip, qaltasyn qampaıtqysy keletin paıdakúnemder de kezdesip qalady. Osy jerde eriktilerdiń kómegi qajet-aq. Batysqazaqstandyq volonterler búginde túrli monıtorıng toptardyń quramyna kirip, kún saıyn bazarlar men dúkenderde baǵanyń ósip ketpeýin, satýshylardyń betperde, qolǵap, antısepık quraldaryn qoldanýyn, oıyn-saýyq oryndary, kafeler men dúkenderdiń keshki saǵat 10.00-nan keıin jumys jasamaýyn qadaǵalap júr.
- Bul úsh baǵyttan bólek oblys turǵyndaryn úıde bolýǵa úgittep – #Úıdebol, medısına qyzmetkerlerin qoldaýǵa arnalǵan – #Bizdińdárigerlergerahmet heshtegterin áleýmettik jelide taratyp jatyrmyz, - deıdi Nurhat Serikqalıuly.
Aıta keteıik, batysqazaqstandyq eriktilerdiń kómegine muqtaj jandar volunteer07.kz saıtynda nemese 87051430606 nomerine habarlasyp, ótinim qaldyra alady.
Sýretti túsirgen Rafhat Halelov
Batys Qazaqstan