2019 jyly «SaryarkaAvtoProm» JShS jalpy somasy 186,6 mlrd teńgeniń 25802 avtomobılin shyǵardy. Bıylǵy jospar boıynsha 26 myńnan astam avtokólik quraly shyǵarylsa, onyń 13 myńy Reseıge eksporttalady. Jalpy sońǵy 2 jylda kásiporyn 11,3 mlrd teńgege 2428 avtokólikti Reseı, О́zbekstan, Belarýs, Qyrǵyzstan, Tájikstan sııaqty elderge eksportqa shyǵardy. Bul týraly Indýstrııa jáne ınfraqurylymdyq damý mınıstrliginiń baspasóz qyzmeti habarlady.
О́tken jyldyń tamyz aıynda Qazaqstanda óndirilgen «Ravon» markaly avtomobılderdiń 500 danasy alǵash ret Reseıge jáne Qyrǵyzstanǵa jetkizildi. Jalpy Qostanaıdaǵy zaýytta 20, 6 mlrd teńgege Ravon «Nexia R3» úlgisindegi kóliktiń 5366 danasy shyǵaryldy.
«GeneralMotors» LLC maquldaýymen jumys istep turǵan «Ravon» dılerlik jelisin «Chevrolet» jelisimen ıntegrasııalaý jumystary júrgizilip jatyr. Bul shara eksport naryǵyndaǵy avtomobılderdiń básekege qabilettiligin arttyrýy tıis.
Búgin «SaryarkaAvtoProm» JShS zaýytynda Chevrolet avtokóliginiń óndirisi iske qosyldy. Olar: otbasyǵa arnalǵan sedan - Chevrolet «Cobalt» (buǵan deıin Ravon R4 ataldy), kommersııalyq maqsatta paıdalanylatyn Chevrolet «Damas» jáne Chevrolet «Labo», SUV-B sanatyndaǵy qalaǵa arnalǵan krossover - Chevrolet «Tracker», jol talǵamaıtyn kólik - Chevrolet «Trailblazer», premıým sanattaǵy Chevrolet «Malibu», Chevrolet «Traverse» jáne Chevrolet «Tahoe». Barlyǵy 8 jańa úlgi.
Sonymen qatar 2019 jyly Astana, Pavlodar, Atyraý, Aqtaý, Shymkent qalalaryna bir qýattaýmen 230 shaqyrymǵa deıin júretin elektr avtobýstar jetkizildi. Jáne Qazaqstan Respýblıkasynda avtobýs parkin aýystyrý baǵdarlamasy aıasynda elektromobılderge arnalǵan qýattaý ınfraqurylymyn jasaqtaý bastaldy. Nur-Sultan qalasyna 22 dana, Pavlodarǵa 10 elektr avtobýs jetkizildi.