Orta salmaqtaǵy tanymal qazaqstandyq boksshy Qanat Islamnyń (27-0, 21 KO) kelesi qarsylasy belgili boldy. RingPolska basylymynyń jazýynsha, otandasymyzdyń qarsylasy álemniń eks-chempıony meksıkalyq Haıme Mýngııa (34-0, 28 KO) bolmaq.
Islam – Mýngııa jekpe-jegi ekinshi orta salmaqtaǵy meksıkalyq Saýl «Kanelo» Alvares (53-1-2, 36 KO) pen brıtanııalyq Bıllı Djo Sonders (29-0, 14 KO) arasyndaǵy boks keshinde ótedi. Áýelde «Kanelo» men Sonders aıqasy 2 mamyrǵa josparlanǵan bolatyn. Alaıda koronavırýs pandemııasyna baılanysty aıqas birneshe aptaǵa shegerildi.
Aıta keteıik, Haıme Mýngııa osy jyldyń qańtar aıynda orta salmaqtaǵy alǵashqy jekpe-jegin ótkizip, ırlandııalyq Gerı O’Sallıvandy (30-4, 21 KO) nokaýtpen jegen-di.
Al otandasymyz eń keıingi aıqasynda namıbııalyq Ýolter Kaýtondokvadan (18-2, 17 KO) tóreshiler sheshimimen basym túsken edi. Kezdesý 2019 jyldyń qazan aıynda Almatyda ótken bolatyn.