Aýmaǵy tutastaı oqshaýlanyp, qatań karantın rejımine kóshken Almatyda tazalyq jumysy kúnine eki márte, tańerteń jáne keshki ýaqyttarda júrgizilip jatyr. Almaty qalasy boıynsha Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova shahar kósheleri men aýlalardy zararsyzdandyrýǵa 0,05% natrıı gıpohlorıti qoldanylatynyn aıtty.
«Atalǵan dezınfeksııa quraly jappaı zararsyzdandyrý úshin paıdalanýǵa ruqsat berilgen. Quramynda toksın az. Aýrý oshaqtaryn dezınfeksııalaýǵa 1% eritindini qoldanamyz. Qoldaný kezinde barlyq saqtyq sharalary jasalady», - deıdi Moldaqasymova.
Buǵan deıin qalalyq Jasyl ekonomıka basqarmasy basshysynyń orynbasary Dıas Ahmetqalıev 29 mıllıon sharshy metr jol, trotýar men jaıaý júrginshiler joly dezınfeksııalyq qospamen jýylatynyn málimdegen edi. Sondaı-aq basqarma ókili turǵyndardan paıdalanylǵan medısınalyq qaldyqtardy ári qaraı zalasyzdandyrý maqsatynda bólek qapshyqtarǵa jınap, shyǵarýlaryn suraǵan bolatyn. Mamandardyń sózinshe, dezınfeksııaǵa arnalǵan qospalardyń adam men janýarlardyń densaýlyǵyna múlde zııany joq.