Tótenshe jaǵdaı kezinde eń aýyr júk arqalaıtyn mamandyq ıeleriniń kósh basynda polıseıler men dárigerler turatyny daýsyz. Jappaı karantın engizilip, tótenshe jaǵdaı tártibi barynsha kúsheıtilgen Almaty qalasynda polısııa qyzmetkerleri qaıda turyp jatyr?
Tártip barshaǵa ortaq. Búginde 700-ge jýyq polısııa qyzmetkeri qaladaǵy jataqhanalarǵa ornalasqan. Olardyń deni shahardan tys jerde turatyn saqshylar. Bul karantındik rejımge baılanysty vırýstyń taralmaýy úshin qolǵa alynyp otyr. Tártip saqshylary turatyn jataqhanalarda turmysqa qajetti barlyq jaǵdaı jasalǵan.
– Bizdiń qalamyz karantın rejıminde bolǵandyqtan, kez kelgen turǵyn juqpaly aýrýdyń qozdyrǵyshy bola alady. Tótenshe jaǵdaıda quqyq qorǵaý júıesiniń jumysy kúsheıip, polısııa qyzmetkerleriniń halyqpen baılanysy – jumystyń ajyramas bóligi bolyp tabylady. Polısııa jumysynyń ereksheligine baılanysty qalanyń syrtynda turatyn tártip saqshylaryn ýaqytsha turǵyn úımen qamtamasyz etý týraly sheshim qabyldandy. Memleket esebinen bizdiń qyzmetkerlerge barlyq jaǵdaı jasaldy. Karantın kezinde Almatynyń barlyq polısııa qyzmetkerleri kazarmalyq rejımde – qalada bolady, – deıdi Almaty qalalyq Polısııa departamenti basshysynyń orynbasary Abdýalı Nasharbekov.