Qurlyqtyq hokkeı lıgasy jolyndaǵy Gagarın kýbogynyń onlaın oıynynda baq synap jatqan «Barys» klýby jankúıerleri ekinshi daýys berý matchynda da jeńiske jete almady.
Bir qyzyǵy, uıymdastyrýshylar bul joly da «Barys» jankúıerleri daýys berý kezinde ereje buzǵanyn aıtyp, jerlesterimizdiń 50 paıyz daýysyn shegerip tastady. Esterińizde bolsa, alǵashqy daýys berý oıynynda da dál osyndaı sebeppen «Barys» jankúıerleri 50 paıyz daýysynan aıyrylǵan bolatyn. Osylaısha, ekinshi onlaın matchta da «Sıbır» jankúıerleri belsendilik tanytyp, jeńiske jetti.
QHL-diń áleýmettik jelidegi (VK, Twitter, Odnoklassnık, Instagram) resmı paraqshalaryndaǵy 12 saǵatqa sozylǵan saýaldama qorytyndysy boıynsha «Barys» jankúıerleri 33 287 daýys, al «Sıbır» jankúıerleri 61 798 upaı jınaǵan. Kelesi daýys berý matchy erteń ótedi. Eki oıyn nátıjesi boıynsha «Sıbır» 2:0 esebimen alǵa shyqty.