Búkil álemde COVID-19 ınfeksııasynyń taralýyna baılanysty bıylǵy kóktem erekshe bolyp tur.
Almatydaǵy Kardıologııa jáne ishki aýrýlar ǵylymı-zertteý ınstıtýtynyń Respýblıkalyq allergologııalyq ortalyǵynyń jetekshisi, medısına ǵylymdarynyń kandıdaty, joǵary sanattaǵy dáriger Dınara Talǵatbekova maýsymdyq allergııasy bar, tynys joldarynyń sozylmaly allergııalyq aýrýlaryna shaldyqqan adamdarǵa koronavırýstyń taralýyna baılanysty joǵary qaýip tónýi múmkin, deıdi.
Dınara Jeńisbekqyzynyń aıtýynsha, muryn-jutqynshaq – vırýstar men allergenderdiń negizgi qaqpasy. Qaýipti agentterdiń alǵashqy kedergisi bolyp tabylatyn muryn-jutqynshaqtyń silemeıli qabyǵyna erekshe nazar aýdarý qajet. Tynys joldarynyń sozylmaly allergııalyq qabynýy pasıenttiń silemeıli qabyǵyn vırýstarǵa osal etedi.
Sondyqtan, kóktem mezgilinde, ásirese sáýir aıynyń aıaǵynda – mamyrda, aǵashtar shań basa bastaǵanda, megapolıs turǵyndary saq bolýlary kerek.
Muryn qýysy óziniń silemeıli qabyǵymen únemi vırýstarmen kúresip, muryn arqyly ótetin aýany tazartyp otyrady. Oǵan ártúrli bakterııalar, vırýstar, tozań jınalady. Vırýstyq ınfeksııa aǵzaǵa tynys alý jolymen enip, tynys alý joldarynyń jasýshalarynda – kómeı, traheıa, bronhtarda jınalady. Bul allergenniń silemeıli qabyqqa ońaı enetindigin bildiredi. Immýnıtet álsiregen kezde zaqymdalǵan silemeıli qabyqtar arqyly vırýstar men allergender organızmge zııan keltiredi. Eger vırýsqa kóktemdegi ósimdikter men shópterdiń gúldenýine baılanysty allergııa qosylsa, naýqastyń jaǵdaıyna áser etýi múmkin.
Sondyqtan, ınfeksııa allergııanyń barysyn, al allergııa – vırýstyq ınfeksııanyń aǵymyn nasharlatady. Sol sebepti, aýrýdyń aldyn-alý óte mańyzdy. Eń qarapaıymy – muryndy, aýyzdy jáne tamaqty tuzdy sýmen shaıý. Bul tańerteń tisti tazalaý sııaqty. Biz tisterimizdi keshke de tazalaımyz, qolymyzdy da kúnine birneshe ret jýamyz, murynnyń silemeıli qabyǵymen de solaı jasaý kerek. Vırýstyq ınfeksııa kezinde muryn-jutqynshaqtyń ýaqtyly emdelmegen aýrýlary (sınýsıtter, farıngıt) aýyr asqynýǵa ákelýi múmkin.
Allergııasy bar naýqas, ásirese qazir ósimdikterdiń gúldený kezeńinde aýrýdyń belgileri men aýyrlyǵyn baqylaý úshin dárigerdiń taǵaıyndaǵan terapııasyn qabyldaýy kerek. Vırýstar árdaıym allergııalyq aýrýlardyń, ásirese bronh demikpesiniń órshýiniń arandatýshysy retinde áreket etedi.
Bronh demikpesi bolǵan jaǵdaıda, pasıent dáriger taǵaıyndaǵan negizgi qabynýǵa qarsy terapııany alýy kerek, sonymen qatar vırýstyq-bakterıaldy ınfeksııasynyń qosylý erekshelikterin eskere otyryp, emdeýde vırýsqa, bakterııaǵa qarsy, ımmýnomodýlıatorlyq dári-dármekterdi qoldanýǵa bolady.
ALMATY