2018 jyldyń 14 sáýrinde Ýkraınanyń Nıkolaev qalasynda belgisiz bireý bokstan tanymal bapker Sergeı Korchınskııdi soqqyǵa jyǵyp, ol es-tússiz kúıde aýrýhanaǵa jetkizilgen bolatyn.
Jergilikti polısııa taratqan málimet boıynsha jergilikti dúkenderdiń biriniń mańynda bapker men bógde bir adam sózge kelispeı, janjaldasyp qalady. Onyń aqyry tóbeleske ulasady. Qarsylasynyń aýyr soqqysynan keıin Korchınskııge shúıdesimen asfalta qulap, esinen tanady. Bas-súıegi synyp, mıy qatty shaıqalǵan Sergeı uzaq ýaqyt jansaqtaý bóliminde jatady. Tek arada úsh aı ótkennen soń esin jııady. Desek te áli kúnge deıin tanymal bapker aýyr jaraqattardan tolyqtaı aıyǵa qoıǵan joq.
Kóp uzamaı kúdikti anyqtaldy. Aýyr qylmys jasaǵan 39 jastaǵy Karen Sarkısıan Qrymda boı tasalap júrdi. Ýkraınanyń quqyq qorǵaý organdary izdep jarııalaǵanymen, birazǵa deıin ol ustatpady. 26 naýryzda Sarkısıan Nıkolaev qalasyna kelip, polıseılerge óz erkimen berildi. Ázirge ol 60 kúnge qamaýǵa alyndy.
Bul oqıǵa jaıynda biz beker áńigimelep otyrǵan joqpyz. 57 jastaǵy Sergeı Korchınskıı kezinde Qazaqstanda eńbek etip, «Astana arlandary» klýbyn tárbıeledi. Sol mamannyń jetekshiligimen jerlestermiz 2013 jyly Dúnıejúzilik boks serııasynyń jeńimpazy atansa, Korchınskııdiń ózi osy jobanyń eń úzdik bapkeri dep tanyldy.