Bıylǵy 25 naýryzdan bastap tótenshe jaǵdaıdy qamtamasyz etý jónindegi Jedel shtabtyń sheshimine jáne Almaty qalalyq Taýarlar men qyzmetterdiń sapasy men qaýipsizdigin baqylaý departamentiniń usynysyna sáıkes, mamandandyrylǵan kompanııalar qaladaǵy turǵyn úı qoryn jappaı zalalsyzdandyrýdy bastaǵan-dy.
Osy árekettiń tıimdiligine oraı, Almaty qalasy ákimdiginiń baspasóz ortalyǵynda qalalyq Turǵyn úı saıasaty basqarmasy basshysynyń orynbasary Meıirjan Otynshıev onlaın-brıfıngte BAQ saýaldaryna jaýap berdi.
Respýblıka boıynsha eń iri turǵyn úı qory Almaty qalasynda. Onyń quramynda 800-den astam basqarý organy qyzmet kórsetetin shamamen 8,5 myń kóppáterli úı, 23,5 myń kireberis jáne 4 myń aýla bar.
– Jumys kóleminiń aýqymdylyǵy eskerilip, barlyq aýdanda zalalsyzdandyrý 3 kúnge bólinip, olardyń jalpy sanynyń kem degende kúnine 33%-y qamtylady. Osylaısha, kópqabatty úılerdiń kireberisteri men aýlalary kestege sáıkes aptasyna 2 ret óńdeledi.
Jumys kestesine keletin bolsaq, zalalsyzdandyrýdyń birinshi kezeńiniń tájirıbesin eskere otyryp, biz olardy túzettik. Búgingi kúni olar veb-saıttarda jáne aýdandyq ákimdikterdiń áleýmettik jelilerdegi resmı esepterinde qoljetimdi, sonymen qatar kireberister men aqparattyq stendterde ornalasqan.
Qazirgi ýaqytta jumysqa shamamen 70 brıgada, 500-den astam adam jumyldyrylǵan, – dedi M.Otynshıev.
Kóppáterli turǵyn úılerdi zalalsyzdandyrýǵa, óńdeýde qoldanylatyn ónimder sertıfıkattalǵan jáne olar adamdar men úı janýarlary úshin qaýipsiz dep otyr mamandar. Ol ónimder medısınalyq uıymdarda, mektepterde jáne balalar mekemelerinde, bakterııalyq, vırýstyq, sańyraýqulaq etıologııasynyń, ásirese qaýipti jáne karantındik ınfeksııalardyń oshaqtarynda profılaktıkalyq dezınfeksııa retinde qoldanylady.
Olar Qazaqstan Respýblıkasynda jáne Keden odaǵy aýmaǵynda qoldanýǵa ruqsat etilgen, sonymen qatar Biryńǵaı sanıtarlyq-epıdemıologııalyq jáne gıgıenalyq talaptarǵa sáıkes keledi, ST-KZ sertıfıkattaryna ıe.
Buryn habarlanǵandaı, qala ákimdigi turǵyndardy qoldaýda birqatar qosymsha sharalar qabyldady, sonyń ishinde almatylyqtar sýmen jabdyqtaý jáne sý tartý qyzmetterine («Almaty Sý» MKK), jylý jáne ystyq sýmen jabdyqtaýǵa («Almaty jylý jelileri» JShS) jáne elektr energııasyna («Almatyenergosbyt» JShS), gazben jabdyqtaý («QazTransGaz Aımaq» AQ Almaty óndiristik fılıaly) jáne telefon baılanysyna («Almatytelekom» ATD) tólem jasaýdy keıinge qaldyrdy. Basqarma basshysy osy jóninde de aıtyp ótti.
– Bul bastamany lıft uıymdary da qoldady. Olar qala turǵyndaryna aıyppul sanksııalaryn qoldanbaı, eki aıǵa (naýryz, sáýir) tólemdi keıinge qaldyrdy. Osyǵan baılanysty, búginde turǵyndar tarapynan kommýnaldyq tólemderdi keıinge qaldyrý jóndeý jáne qyzmet kórsetý aqylaryna da qatysty ma degen suraqtar jıi qoıylady. Turǵyn úı saıasaty basqarmasy tarapynan aı saıynǵy jarnalar bolmaǵan kezde basqarý organdarynyń qyzmetin qamtamasyz etý múmkin emestigin túsindiremiz.
Turǵyn úıdi jóndeý jáne kútip ustaý qorynan aýla sypyrýshylardyń, klınıngtik kompanııalardyń eńbekaqysy, avarııalyq qyzmetterdiń, lıftiler men kótergishter sııaqty qaýipti tehnıkalyq qurylǵylarǵa qyzmet kórsetetin uıymdardyń shaqyrýlary, sondaı-aq kondomınıýmnyń tynys-tirshiligin qamtamasyz etý jáne ortaq múlikti qaýipsiz paıdalaný, onda tıisti tártipti saqtaý, dezquraldardy paıdalana otyryp, sanıtarlyq ylǵaldy tazalaý úshin qajetti basqa da shyǵyndar tólenedi.
Bul rette, basqarý organdaryna tótenshe jaǵdaıdyń qoldanylý kezeńinde jarnalardy keıinge qaldyrýdy kózdeı otyryp, kúrdeli jóndeýge jarnalar júrgizýge múmkindigi joq menshik ıelerine aıyppul sanksııalaryn qoldanbaýdy usynamyz, – dedi qalalyq Turǵyn úı saıasaty basqarmasy basshysynyń orynbasary M.Otynshıev.
Sondaı-aq Turǵyn úı-kommýnaldyq sharýashylyǵyn jańǵyrtýdyń memlekettik baǵdarlamasy boıynsha kondomınıým obektisiniń ortaq múlkine kúrdeli jóndeý júrgizý boıynsha qaryzdy óteýge arnalǵan tólemderge qatysty menshik ıeleri de karantın ýaqytynda tólemderdiń merzimin uzarta alady. Tóleý múmkindigi bolmaǵan jaǵdaıda aıyppul sanksııalary qoldanylmaıdy.