Qazirgi tańda álemdegi sporttyq jarystardyń barlyǵy COVID-19 indetine baılanysty ýaqytsha toqtap tur. Al 2020 jylǵy Tokıo Olımpıadasy taǵy bir jylǵa uzartylyp, 2021 jyldyń 23 shildesi men 8 tamyzy aralyǵynda ótetin boldy.
Halyqaralyq dzıýdo federasııasy Olımpıada ýaqyty aýyspaǵan jaǵdaıda, 30 mamyr kúni reıtıngti jabýy tıis bolatyn. Alaıda, Olımpıada joldamasyna talas endi odan ári jalǵasady. Osyǵan oraı, Qazaqstannyń Ulttyq Olımpıada komıtetiniń baspasóz qyzmeti qazaqstandyq sportshylardyń Olımpıadalyq reıtıngtegi jaǵdaıyn sholyp shyqty.
60 kıloda beldesetin Eldos Smetov 5018 upaımen úshinshi orynda bolsa, Ǵusman Qyrǵyzbaev 6-satyda. 66 kılodaǵy Erlan Serikjanov 12-shi, Eldos Jumaqanov 20-orynda. 73 kılo salmaqtaǵy Jansaı Smaǵulov 24-orynda tur.
81 kılodaǵy Dıdar Hamza 32-orynda bolsa, 90 kılodaǵy Islam Bozbaev 19-satyda. 100 kıloǵa deıingi salmaqta Aıbek Serikbaev 50-shi, al 100 kılodan joǵary salmaqtaǵy Erasyl Qajybaev reıtıngtiń 37-shi satysynda.
Ázirge, IJF Olımpıadaǵa irikteý týrnıriniń qalaı jáne qashan jalǵasatynyn málimdegen joq.