Karantınniń alǵashqy kúni. Blok-beketterde quqyq qorǵaý qyzmetkerleri men dárigerler táýlik boıy kúzetýde. Oblys boıynsha 8, al, Kókshetaý shekarasynda 12 baqylaý-ótkizý beketi ornatyldy. Oblys aýmaǵynda jalpy sany 50-den astam beket qoıylmaq.
Karantınniń alǵashqy kúni aqmolalyqtar oryn alǵan jaǵdaıǵa túsinistik tanytyp, óreskel oqıǵaǵa jol bermedi. Tártip talaby qatań. Buljytpaı oryndaý kerek.
– Nur-Sultan-Petropavl tas jolynyń 292 shaqyrymynda baqylaý-ótkizý beketi ornatylǵan. Sanıtarlyq-epıdemıologııalyq qyzmetiniń mamandary da beketterde kezekshilik atqarýda. Olar azamattardan sońǵy 14 kúnde qaıda bolǵany jóninde surap bilýde. Ár bekette shamamen 12 adam kezekshilik atqarady, – deıdi oblystyq ákimshilik polısııasy basqarmasynyń aǵa ınspektory Aıbek Hasenov.
Jolaýshylar barar baǵytyn, jol júrý maqsatyn túsindirip jatty. Árqaısysynyń qolynda ruqsat qaǵazdary bar. Polısııa qyzmetkerleriniń aıtýynsha, ázirge óreskel zań buzýshylyq tirkelgen joq. Azamattardyń karantın rejımine degen kózqarastary oń. Beketten ótkizbegen kólikter esh qarsylyqsyz keıin qaıtýda.