Buryn-sońdy bolmaǵan jahandyq tótenshe jaǵdaıda balalardyń ýaqytyn tıimdi paıdalaný da ózekti jáıtterdiń qataryn kóterildi. Balanyń kóńilin ónermen, bilimmen aýlaý bárinen de kókeıkesti bolyp tur.
Osyǵan oraı, Qazaqstanda «Janýarlar – meniń dostarym» atty sýret salýdan respýblıkalyq balalar baıqaýy bastaldy. Birden aıta ketý kerek, bul baıqaý álemdik indet bastalmaı turyp-aq, qolǵa alynǵan-dy. Aldyn ala josparlanǵanadı, jeńimpaz balalar Venaǵa bara ala ma? Ol ýaqyttyń enshisinde.
Sonymen 1 sáýirden bastap 6-17 jas aralyǵyndaǵy balalar men jasóspirimder óz týyndylaryn baıqaýǵa jibere alady.
Týyndyda beıneleý óneriniń kez kelgen tehnıkasyn: kórkem sýret, grafıka, applıkasııa, kollaj, kompıýterlik grafıkany qoldanýǵa bolady. Basty shart – avtorlyq ári túpnusqada tapsyrylǵan jumystyń bolýy. Baıqaýǵa qatysýshy úsh kompozısııaǵa deıin usyna alady. Kórkem týyndyǵa esse jazsa, quba-qup. О́tinishter 2020 jyldyń 30 maýsymyna deıin qabyldanady.
– Konkýrs ótkizý ıdeıasyn balalardyń ózderi karantın bastalmaı turyp usynǵan. Nege deseńiz, olar úlkenderdiń úı janýaryna qatigezdik tanytyp, jabaıy tabıǵatty maqsatsyz joıý áreketine beı-jaı qaramaıdy, tipti kóbine júrekteri aýyrady. Osy oraıda atalǵan baıqaý jas býynnyń dúnıejúzilik bıologııalyq tepe-teńdikti saqtaý máselesine qatysty jeke pikirin bildirýge múmkindik berip, karantınde otyrǵan ýaqytty paıdaly ótkizýge kómektesedi, - deıdi bastama ıesi QR Bala quqyǵy jónindegi ýákil Arýjan Saın.
Baıqaýǵa «Edu Stream» kompanııasy usynǵan basty syılyq – Venada ótetin balalar sýretiniń kórkemóner kórmesine qatysý (COVID 19 pandemııasy aıaqtalǵanda). Sondaı-aq, jeńimpazdar QR Mádenıet jáne sport mınıstrliginen dıplom men baǵaly syılyq ıelenedi, joba seriktesi «Nastoıashıı Býratıno» saýda markasynan da yntalandyrý syılyǵy bolady. Top jarǵandardyń týyndysy Qazaqstannyń barlyq aımaǵynda kóshege bılbordqa ilinedi. Barlyq qatysýshy elektrondyq dıplom ıelenedi.
Balalardyń eńbegin uıymdastyrýshylar men Qazaqstannyń bedeldi mádenıet jáne óner qaıratkerlerinen quralǵan ádil qazylar alqasy baǵalaıdy. Jeńimpazdar tórt jas deńgeıi boıynsha anyqtalady. Baıqaý nátıjesi 2020 jyldyń 5 shildesi jarııalanady. Top jarǵan ónerli balalardy saltanatty túrde marapattaý sharasy Almatyda jazdyń sońyna qaraı ótedi.
Konkýrs Qazaqstan Prezıdentiniń qamqorlyǵymen, BUU qorshaǵan ortany qorǵaý baǵdarlamasynyń Dúnıejúzilik qorshaǵan ortany qorǵaý kúni aıasynda, Bilim jáne ǵylym mınıstrligi, Mádenıet jáne sport mınıstrliginiń qoldaýymen, «Balalar Álemdi Beıneleıdi» Qoǵamdyq Qory, bas seriktes «Edu Stream» kompanııasy men «Nastoıashıı Býratıno» seriktesiniń qatysýymen ótedi.
Týyndyny túpnusqada myna poshtalyq adreske: Qazaqstan Respýblıkasy, Almaty q., 050026, M. Áýezov kósh., 14a. «Balalar Álemdi Beıneleıdi» Qoǵamdyq Qory, «Janýarlar – meniń dostarym» baıqaýyna jiberý kerek. Sondaı-aq elektrondyq poshta: alembala.kz@gmail.com. Tolyq aqparat www.alembala.kz saıtynda.