Turǵyndardyń qaýipsizdigin qamtamasyz etý, juqpaly indettiń aldyn alý maqsatynda Qyzylorda oblysynyń Qazaly aýdanynda keshe túnnen bastap 15-sáýirge deıin karantındik rejım engizildi. Aýdannyń bas sanıtarlyq dárigeriniń qaýlysymen aýdanǵa kóliktiń barlyq túrleriniń kelýine jáne shyǵýyna tyıym salynady. Bul týraly aýdan ákiminiń baspasóz qyzmeti habarlady.
Qaýlyǵa sáıkes aýdan aýmaǵyna azyq-túlik taýarlaryn, dárilik zattardy, medısınalyq buıymdardy jáne basqa da turǵyndardyń ómir súrýine qajetti taýarlar men qyzmet túrlerin tasymaldaıtyn, óndiristik jáne aýyl sharýashylyǵy kásiporyndarynyń úzdiksiz jumys jasaýyn qamtamasyz etetin kólikterden basqa avtokólikterge kirýge jáne shyǵýǵa tyıym salynady.
Poıyz stansııasynda da osyndaı shekteýler engizildi. Dinı úıler, balabaqshalar, bazarlar (mal bazarlary, avtomobıl jáne t.b.), saýda úıleri, azyq-túlik emes saýda ortalyqtaryna qyzmet kórsetetin kásipkerlik qurylymdardyń barlyq túrleri, adamdar kóp shoǵyrlanatyn basqa da oryndar jumysyn toqtatty.
Azyq-túlik saýda oryndaryna, dúkenderge jumysyna kúsheıtilgen sanıtarlyq-dezınfeksııalyq rejımmen saǵat 8:00-22:00-ge deıin, al azyq-túlik bazarlarynda saǵat 10:00-18:00-ge deıin jumys isteýge ruqsat etiledi. Dárihanalardyń jumysy da osyndaı talapqa baǵynady.
Aýdannyń bas sanıtarlyq dárigeriniń qaýlysynda budan ózge de birqatar qaýipsizdik sharalary bar.