Epıdemıologııalyq jaǵdaıǵa baılanysty túzeý mekemelerinde jazasyn ótep jatqandar da qaýipsizdik sharalaryna asa qajetti medısınalyq betperde tigip jatyr.
Qyzylorda qalasyndaǵy ZK-169/5 mekemesi janyndaǵy RGP «Eńbek- Qyzylorda» tigin sehynda 30 azamat osy ispen aınalysýda. Búgingi kúnge deıin sehta qazir qat taýarǵa aınalyp turǵan betperdeniń 14250 danasy tigildi.
Mınıstrlik tapsyrmasyna oraı Qylmystyq atqarý júıesi komıteti men «Eńbek» RMK basshylyǵy qaterli indettiń órship ketpeýine úles qosyp jatqan osyndaı azamattarǵa jalaqydan bólek syıaqy tóleýdi uıǵarypty. Keshe tigin sehyndaǵy azamattarǵa basshylyq ókilderi kelip, qıyn sátte qol ushyn sozyp, kómek kórsetkenderi úshin alǵys aıtyp, esepshottaryna syıaqy aýdarylǵanyn habarlady.