«...О́tinimdi jiberý úshin sıfrlyq ID quryp, sáıkestendirý rásiminen ótýińiz kerek. Aldymen aqparattyq júıege uıaly telefon nómiririńizdi engizesiz. Sosyn kompıýter arqyly selfı jasap jáne ózińizdiń jeke kýáligińizdiń túpnusqasyn sýretke túsirip jiberesiz. Sizdiń jeke basyńyzdy rastaǵan soń, júıe sizdi ESQ alý betine qaıta baǵyttaıdy, ol jerde ESQ-ny saqtaýǵa arnalǵan joldy kórsetýińiz kerek bolady...»
Bul Almagúl Baqtııarqyzy Qabyltaevanyń karantın kezindegi kúndelikti jumysynyń bir sáti. Kezekti klıentke elektrondyq sandyq qoltańbany onlaın alý jolyn túsindirýde. Ol «Azamattarǵa arnalǵan úkimet» memlekettik korporasııasy Almaty qalasy fılıaly jasaqtaǵan Call-ortalyq operatory. 1414 nómiri boıynsha azamattarǵa úıde otyryp keńes beredi.
«Mınýtyna 3-4 qońyraý túsedi. Barlyq qońyraýǵa jaýap berýge tyrysamyn. Keıde qońyraýdyń qyzyǵyna túsip, as ishýdi de umytyp ketem. Osyndaı qıyn kezeńde halyqqa paıdam tıse deımin. Olar da erikkennen qońyraý soqpaıdy. О́ziń bilgendi ózgemen bóliskenge ne jetsin?! Ári alǵystary men batalaryn alamyn», - deıdi Almagúl jumysyna qanaǵattanǵan sezimde.
Almagúl Qabyltaeva «Azamattarǵa arnalǵan úkimet» MK» KEAQ Almaty fılıalyna osydan bes jyl buryn jumysqa kirgen. T.Rysqulov atyndaǵy ekonomıkalyq ýnıversıtetinde qarjy-ekonomıst magıstri dárejesin alǵan ol, HQO-ǵa kelgenge deıin Zeınetaqy tólemderi jónindegi memlekettik ortalyqta jumys istegen. Búginde Bostandyq aýdandyq front-ofısindegi bilikti de tájirıbeli mamandardyń biri. Otbasynda súıikti jar, úsh balanyń anasy.
Qazirgi jaǵdaıǵa baılanysty fılıalda qashyqtyqtan qyzmet kórsetýdi uıymdastyryp jatqanda, ujym Almagúldi qashyqtyqtan keńes beretin Call-ortalyq jumysyna úıden qosylatyn 50 operatordyń qataryna qosqan. Búginde otbasynyń ortasynda, balapandarynyń janynda, úıde otyryp halyqqa qyzmet kórsetip otyr.
«Jumys orny úıde degeni bolmasa, talap ádettegideı. Tańǵy saǵat 9.00-de bastalǵan jumys keshki 18.30-ǵa deıin jalǵasady. Kúnine 200-250 qońyraýǵa jaýap beremin. Keńes alýǵa qońyraý shalatyndar týý týraly kýálik alý, bala týýyna baılanysty járdemaqylar, MAB jazý, avtokólikke qatysty qujattardy úıge jetkizý qyzmeti, onlaın ESQ alý, jeke kýálik alý, ýaqytsha jáne turaqty tirkeý, emhanaǵa bekitý týraly, avtokólik quraldaryn esepten shyǵarý jáne qoıý, avtokólikke tyıym salýdy tekserý, júrgizýshi kýáligin qalaı alý jáne aýystyrý týraly, sondaı-aq qaıtys bolý týraly kýálikti qalaı alý, jerleýge arnalǵan qujattardy, tehnıkalyq pasport, jer ýchaskesiniń memlekettik aktisi, JK qalaı ashýǵa bolady jáne t. b. suraqtardy jıi qoıady», - deıdi Almagúl.
Iá, búginde 608 memlekettik qyzmetti elektrondyq úkimet portaly arqyly alýǵa múmkindik bar. Smartfon arqyly 60 qyzmet túri qoljetimdi. Alaıda, ekiniń biri onlaın qyzmet alýdy bilmeıdi. Basqa túskende adam áreketke umtylady, bilmegenin suraıdy. Sol sebepti, fılıal karantın kezinde halyqqa keńes berýshiler qataryn kóbeıtken.
Osylaısha, «Azamattarǵa arnalǵan úkimet» MK KEAQ halyqtyń elektrondyq úkimet portalyn belsendi paıdalanyp, syrtqa shyqpaı-aq, bar jumysyn úıde bitirip, memlekettik qyzmetterdi onlaın alýyna jaǵdaılar jasaǵan. Fılıaldaǵy Call-ortalyqtaǵy 60 operatorymen qatar, Almagúl sekildi úıde otyryp keńes beretin 50 operatordyń da kúndelikti jumysy osylaı jalǵasady.