Qyzylorda oblysynda indettiń taralýyn boldyrmaý maqsatynda búgin óńirdiń bas sanıtarlyq dárigeriniń №7 qaýlysy qabyldandy. Osyǵan sáıkes bekitilgen birqatar shekteýler men qaýipsizdik sharalary jaıly oblys prokýrorynyń birinshi orynbasary Talǵat Álibaev onlaın brıfıngte aıtyp ótti.
Qaýlyǵa sáıkes azamattarǵa dárilik zattar, azyq-túlik alý úshin ǵana úıinen shyǵýǵa ruqsat etiledi. Medısınalyq kómek alatyndar men jumysqa baratyndar arnaıy anyqtama nemese kýálikterin kórsetýi qajet.
Sonymen qatar 55 jastan asqan azamattarǵa kóshege shyǵýǵa tyıym salynyp otyr.
Osyǵan deıingi shekteýlerge qaramastan 17 úı ıesi óz aýlasynda toı jasap, 48 dámhana qyzmetterin jalǵastyrǵan. Mobıldik top júrgizgen reıdtik shara nátıjesinde tótenshe jaǵdaı ýaqytynda belgilengen talaptardy buzǵan 90 fakti anyqtaldy, – dedi oblys prokýrorynyń birinshi orynbasary.
Jalpy, osyǵan deıin tótenshe jaǵdaı rejımin buzǵany úshin 179 tulǵaǵa qatysty ákimshilik hattama toltyrylyp, onyń 116-i qaralyp, 54 aıyppul salyndy. Alpys eki adamǵa ákimshilik qamaqqa alý jazasy qoldanylǵan.
Shıeli kentinde birneshe kompıýterlik klýb jumystaryn jalǵastyrǵany úshin ıeleri 10 táýlikke qamaýǵa alynǵan. Blok beketterdi aınalyp ótpek bolǵan 11 adamǵa ákimshilik hattama toltyrylyp, sotqa joldandy.
Talǵat Aıtbaıuly tótenshe jaǵdaı rejımdi buzyp, talaptardy oryndamaýmen qatar jalǵan aqparat taratqandarǵa da qatań sharalar qoldanylatynyn aıtyp ótti.