Tótenshe jaǵdaı kezinde qoǵam tynyshtyǵyn qorǵaǵan polıseılerdiń jumysy qaýyrt bolatyny belgili. Soǵan qaramastan olar otbasylyq qundylyqtardy, salaýatty ómir saltyn nasıhattaý sharalaryn da umyt qaldyrmaıdy. Jýyrda oblystyq polısııa departamentiniń Esirtki bıznesine qarsy kúres basqarmasy «Myqty otbasy – esirtkiden alshaq!» uranymen onlaın formatta otbasylyq konkýrs uıymdastyrdy.
Qyryq otbasy qatysqan saıys shartyna sáıkes ár shańyraqta qurylǵan komanda músheleri – ata-analar, ájeler men balalar úsh nomınasııa boıynsha óner kórsetti.
Áýelgi shart komanda múshelerin tanystyrý boldy. Sodan keıin mýzyka áýenimen komandanyń barlyq músheleri qatysqan fleshmob kórsetildi. Sońynda otbasynda jıi shyrqalyp, súıikti áýenge aınalǵan ándi aıtý tapsyryldy.
Komandalar ózderiniń ónerin beınetaspaǵa, fotoǵa túsirip konkýrstyq komıssııaǵa áleýmettik jeliler messendjerleri arqyly jiberdi.
Baıqaýǵa qatysýshylardyń kópshiligi konkýrs sharttaryn tııanaqty oryndap, túrli derekter arqyly nashaqorlyq problemasyn, onyń qoǵamǵa zardabyn da sheber kórsetti.
Baıqaý komıssııasynyń sheshimine sáıkes Shıeli aýdanyndaǵy Bópejanovtar otbasy jeńimpaz atandy. Shańyraqtyń otaǵasy men otanasy bilim berý salasynyń ókilderi.
Barlyq qatysýshylar baǵaly syılyqtarmen jáne dıplomdarmen marapattalady.