DAZN strımıngtik servısi kásipqoı bokstan IBF jáne IBO tujyrymy boıynsha orta salmaqtaǵy qazaqstandyq álem chempıony Gennadıı Golovkındi (40-1-1, 35 KO) 38 jasqa tolǵan týǵan kúnimen quttyqtap, onyń sporttyq jolyndaǵy bes iri jetistigin atady.
Atalǵan strımıngtik servıs otandasymyzdyń basty jetistikteri retinde 2004 jyly Afına Olımpıadasyndaǵy kúmis júldesin, 2008 ben 2017 jyl aralyǵynda 23 nokaýt serııasyn, orta salmaqtaǵy burynǵy birikken chempıondyq ataǵyn, beldikterin 20 ret sátti qorǵaýyn jáne orta salmaq tarıhyndaǵy nokaýt boıynsha eń joǵary kórsetkishin (89,5 prosent) orasan zor jetistik dep ataǵan.
Golovkın DAZN strımıngtik servısimen byltyr úsh jyldyq kelisimshartqa otyrǵan bolatyn. Kelisim boıynsha otandasymyz úsh jylda alty jekpe-jek ótkizip, 100 mıllıon dollar alady. DAZN-daǵy alǵashqy jekpe-jegin 2019 jyldyń maýsym aıynda ótkizip, kanadalyq Stıv Rollsty nokaýtpen jeńgen edi. Keıinnen qazan aıynda qazaqstandyq boks jankúıerlerine jaqsy tanys, elimizdiń «Astana arlandary» boks klýbynda sátti óner kórsetken ýkraınalyq Sergeı Derevıanchenkodan upaı sanymen basym túsken-di.