Kún jylyp, jerdiń tońy jibigen kezde bastalatyn jyl saıynǵy kóktemgi egis dala jumystary Jambyl óńirinde bıyl da qarqyn aldy. Oblystyq aýyl sharýashylyǵy basqarmasynyń málimetinshe, aýyl sharýashylyǵy daqyldarynyń egis alqaptarynyń qurylymyn ártaraptandyrýǵa sáıkes, bıyl egistik kólemin 710,0 myń gektarǵa ornalastyrý josparlanyp otyr eken.
Onyń ishinde tıisti gektarlarǵa dándi jáne dándi burshaqty daqyldar, maıly daqyldar, qant qyzylshasy, kartop, kókónis-baqsha daqyldary jáne mal azyǵy daqyldary egiletin bolady. Jambyl oblysy agrarlyq aımaq bolǵandyqtan, memleket qoldaýynyń nátıjesinde óńirde jyl saıyn egistik kólemin arttyrýǵa múmkindik týyp otyr. Máselen, ótken jyly egistik kólemi 687,1 gektardy quraǵan. Bıyl bul kórsetkish 22,9 myń gektarǵa artady dep josparlanýda. Sonymen qatar, óńirde ósimdik sharýashylyǵyn ártaraptandyrý maqsatynda dándi daqyldar, maıly daqyldar, qant qyzylshasyn, kókónis-baqsha, kartop jáne mal azyqtyq daqyldardyń da kólemin arttyrý kózdelýde. Negizinen Jambyl óńiri kartop máselesinde soltústik oblystarǵa kóbirek táýeldi. Iаǵnı, kartop ózge óńirlerden tasymaldanady. Osyndaı qajettilikterdi boldyrmaý úshin bıyl ósimdik sharýashylyǵyn ártaraptandyrý qolǵa alynyp otyr.
Al, aýdan ákimdikteriniń bergen málimetteri boıynsha aǵymdaǵy jyldyń ónimine jalpy kúzdik daqyldar 137,4 myń gektarǵa ornalasqan. Onyń ishinde 136,3 myń gektar kúzdik bıdaı jáne 1,1 myń gektar kúzdik arpa egilgen. Sondaı-aq, aqpan aıynda alynǵan monolıttik saraptama jalpy 137,4 myń gektar kúzdik daqyldardyń 76,1 myń gektarynyń jaqsy, 51,8 myń gektarynyń qanaǵattanarlyq jáne 9,2 myń gektarynyń nashar shyǵyp turǵany kórsetken. Sonymen qatar, egistiktiń sapasyn arttyrý úshin tehnıkalardyń da sapalylyǵy mańyzdy. Oblystyq aýyl sharýashylyǵy basqarmasynyń basshysy Berik Nyǵmashev kóktemgi egis-dala naýqanyna aýyl sharýashylyǵy tehnıkalaryn daıyndaý jumystary barlyq aýdandarda jumys josparlaryna sáıkes júrgizilýde ekenin jetkizdi. Jalpy, oblys boıynsha bıylǵy jyly barlyǵy 8419 aýyl sharýashylyǵy tehnıkasy tirkelgen eken. Jáne 4536 traktorlardyń barlyǵy kóktemgi egis dala jumystaryn júrgizýge daıyn.
Kóktemgi dala jumystaryna el Úkimeti tarapynan oblysqa 18,3 myń tonna kepildendirilgen dızel otyny bólingen. Búginge kúnge oblys boıynsha operatorlar belgilenip, operetorlar tarapynan munaı óńdeıtin zaýyttarǵa qarajat aýdarylǵan. Nátıjesinde óńirde dızel otynyn jetkizý jumystary júrgizilýde. Onyń ishinde 3500 tonna dızel naýryz aıyna, 5000 tonna sáýir, 5300 tonna mamyr jáne 4500 tonna maýsym aılaryna bólingen.
Sondaı-aq búgingi kúnge 1747 tonna dızel otyny aýyl sharýashylyǵy salasynyń taýar óndirýshilerine taratylǵan. Búginde óńirde egis dala jumystaryn odan ári jandandyrýǵa memleket tarapynan kórsetilip otyrǵan basqa da kómek kóp. Máselen, naýryz aıynda oblys sharýashylyqtaryna arzandatylǵan dızel otynynyń 1 lıtri 175-177 teńge kóleminde taratylǵan bolatyn. Qoldaýdyń nátıjesinde elimizdiń Energetıka mınıstrliginiń bıylǵy sheshimine sáıkes, dızel otynynyń tonnasy 174000 teńgege tómendegen. Osyǵan oraı, operatorlar qaıtalap munaı ónimderin óndiretin kompanııalarymen kelisim shart jasasýda. Sol sııaqty kúzdegi jazdyq daqyldarǵa súdiger aıdaý jáne súr kóterý jumystary oblys boıynsha 407,7 myń gektarǵa josparlanǵan. Búginde 354,6 myń gektar alqap naqty aıdalǵan. Onyń ishinde jazdyq arpaǵa, jazdyq bıdaıǵa, júgeri dánge, maıly daqyldarǵa, kókónis-baqsha daqyldaryna jáne ózge de ónim túrlerine erekshe mán berilgen. Búginde óńirdegi aýa-raıynyń qubylyp turǵanyna qaramastan, aýyldyqtar da kóktemgi egis dala jumystaryna kirisip ketti. Al, sharýalardyń eńbeginiń nátıjesin ýaqyttyń ózi kórsetedi. Eń bastysy eńbek etýge barlyq múmkindik bar.
Jambyl oblysy