Teriskeıden jetken sıklonnyń nemese halyq «jyndy boran» dep ataıtyn qatty jeldiń kesirinen azyq-túlik ákele jatqan almatylyq eki fýra da joldan taıyp ketedi.
Olarǵa «Jezqazǵan-Petropavl» tas jolynda kezekshilikte júrgen polısııa kishi leıtenanttary Meıram Qazıev pen Bahtııar Alpysbaevtiń patrýldik ekıpajy alǵashqy bolyp qol úshin sozdy. Tártip saqshylary aldymen Soltústik Qazaqstan oblysynyń Tımırıazev aýdanyna aýyl sharýashylyǵy ónimderin alyp qaıtý úshin bara jatqan fýranyń batyp turǵanyn baıqaıdy. Polısııa qyzmetkerleri jaqyn mańdaǵy «Uzynjar» aýylyndaǵy «Qazsýshar» respýblıkalyq kásipornynyń «Esil sý» fılıalynan «K-700» traktoryn bólgizip, almatylyq júrgizýshini tas jolǵa shyǵarady.
Osy oqıǵadan bir kún ótkende Soltústik Qazaqstan oblysy arqyly Qostanaı qalasyna ketip bara jatqan eki úlken júk kóligi Jambyl aýdany aýmaǵynda aq tútek boranǵa tap bolypty. Alaı-dúleı soqqan jeldiń ekpini bos kele jatqan fýralardy jol ústinen ysyrǵan. Bir fýranyń artqy bóligi jol ústinen shyǵyp ketken. Kólik birden toqtap, ornynan qozǵala almaı qalady. Qoldarynda trostary bolmaı qalǵan almatylyqtar 102 arnasyna habarlasypty. Oqıǵa ornyna polısııa kapıtany Ámirjan Toqqojın men polısııa kishi leıtenanty Ǵabıt Sábıt mingen patrýldik ekıpaj kelgen. Olar «Presnoredýt» aýylyndaǵy sharýa qojalyǵynyń jetekshisi Maksım Týrnovtan K-701 traktoryn aldyryp, júrgizýshilerdi Qostanaı oblysynyń shekarasyndaǵy blok-beketke deıin jetkizip salǵan.
«Karantın kezinde trassalarda kólik sany azaıdy», - deıdi SQO PD patrýldik polısııa batalonynyń komandıriniń orynbasary polısııa kapıtany Ýálıhan Orazalın. «Petropavl qalasy men aýdan ortalyqtary jabyq. Tek tranzıttik kólikter men halyqtyń qajettiligi úshin azyq-túlik, taýarlar tasymaldaıtyn avtokólikter ǵana óte alady. Sondaı-aq, eldi mekenderdiń ómiri úshin mańyzdy obektilerde jumys isteıtin azamattarǵa ruqsat berilgen. Biraq patrýldik polısııa qyzmetkerleri jol ústindegi tártipti burynǵydaı qamtamasyz etip, jaǵdaıdy baqylaýda», dedi ol.