Altynsarın aýdanyna qarasty Sataı aýylynyń turǵyndary tórt kún boıy jaryqsyz otyr. Shaǵyn eldi mekenge baratyn kúre jol 7 sáýirde soqqan kúshti borannan keıin qalyń qardyń astynda qaldy. Kúni búginge deıin jol arshyǵan jan joq.
Oblys ortalyǵynan azyq-túlik tasıtyn kólik jete almaǵan soń, aýyldaǵy jalǵyz dúkenniń esigine áldeqashan qara qulyp salynǵan. Aınala dúnıeden oqshaý qalyp, qar qursaýyna qamalǵan aıadaı aýyldyń tirshiligi osylaısha tuıyqqa tirelip tur. Abyroı bolǵanda turǵyndar aýyz sýdy aýladaǵy qudyqtan alyp iship otyr.
Bas-aıaǵy 76 úı tútin tútetip otyrǵan eldi meken Márııam Hákimjanova atyndaǵy aýyldyq okrýgke qaraıdy. Habarlasyp, mán-jaıdy surap bildik. Aýyldyq okrýg ákimdiginiń bas mamany Qaırat Jarasbaevtyń aıtýynsha, 7 sáýirde soqqan soıqan boran Sataıdyń aınalasyndaǵy qalyń qaraǵaı, aǵashtyń kóbin qulatyp ketken. Saldarynan elektr jelileri úzilip, aýyl jaryqsyz qalyp otyr. Qazir Krasnyı Kordon eldi mekenine deıingi qıraǵan joǵary voltty baǵandardy qaıta turǵyzý, úzilgen jeli symdaryn jalǵaý jumystary júrip jatyr. Sodan keıingi kezek Sataıǵa keledi.
Qostanaı oblysy