Búgingi kúni «#BizBirgemiz» aksııasy aıasynda «Nur Otan» partııasy 4,5 myńnan astam otbasyn azyq-túlikpen qamtamasyz etken. Bul týraly partııanyń Almaty qalalyq fılıaly basshysynyń orynbasary Stanıslav Kankýrov málimdedi.
Osynaý ıgi sharanyń júzege asýyna kóptegen azamattar úles qosqan. Partııanyń demeýshiligimen Roza Rymbaeva, Meırambek Bespaev, Sáken Maıǵazıev, Arman Dúısenov bastaǵan otandyq estrada ókilderi az qamtylǵan januıalarǵa 2 500 dana azyq-túlik jıyntyǵyn úlestirgen.
– «Ardagerlerdi ardaqtaıyq» partııalyq jobasy aıasynda NOMAD MMA respýblıkalyq Federasııasy 80 jastan asqan jalǵyz basty qart adamdardy ystyq tamaqpen tegin qamtamasyz etýdi uıymdastyrdy. Ystyq taǵamǵa birinshi jáne ekinshi as, salat, nan jáne kompot kiredi. Kúndelikti 1000-ǵa jýyq qart adam ystyq tamaqpen qamtylǵan, búgingi kúnde 9 myńnan astam túski as jetkizildi. Sonymen qatar, jas kásipkerler Almaty qalasynyń barlyq 27 blok-beketinde jumys isteıtin qyzmetkerlerdi qoldaýǵa nıet bildirip, «Rixos Chemistry» kompanııasy olardy 500 lıtr antıseptık túrindegi sanıtarlyq qorǵaý quraldarymen jáne aýyz sýmen qamtamasyz etti. Mundaı ıgi ister óte kóp. «Nur Otan» partııasy qalalyq fılıalynyń atynan elimiz úshin osyndaı qıyn kezeńde kómek qolyn sozǵan barlyq azamattarǵa úlken alǵysymdy bildirgim keledi. Qala turǵyndaryn osynaý qıyn sátte úıde qalýǵa, karantın rejımin jáne qorǵaný sharalaryn saqtaýǵa shaqyramyn, – deıdi Stanıslav Kankýrov.
Sońǵy kúnderi «Jas Otan» eriktileriniń muqtaj jandarǵa kómek jetkizý jónindegi qyzmeti ýaqytsha toqtatylýyna baılanysty sanıtarlyq qorǵanys jıyntyqtary ortalyqtandyrylǵan túrde «Qazposhta» AQ arqyly jetkizilip kelgen.
«Qorǵanystyń barlyq sanıtarlyq normalaryn saqtaýǵa basa nazar aýdaryldy. Kásibı kýrerlermen jeke kelisimsharttar jasaldy. Sanıtarlyq normalar men erejelerge sáıkes jumysqa jumyldyrylǵan azamattardyń bári arnaıy qorǵanys kostıým, kózildirik, qolǵap jáne betperdelermen qamtyldy», dep atap ótti partııa ókili.