Jalpy Qyzylorda oblys boıynsha búgingi kúnge deıin adamdar kóp jınalatyn bazarlar, vokzal, avtovokzal mańaıy zalalsyzdandyryldy. Jalpy aýdany 3 349 627 sharshy metr bolatyn bul aýmaqtardy dezınfeksııalaýǵa áskerı bólimder sarbazdary men aýdan ákimdikteri jasaqtaǵan toptar jumyldyryldy. Bul týraly oblys ákiminiń orynbasary Naýryzbaı Baıqadamov onlaın brıfıngte habarlady.
Al indet shyqqan oshaqtardy QR DSM «Ulttyq saraptama» ortalyǵynyń Qyzylorda oblystyq fılıaly mamandary zalalsyzdandyrýda.
Búginnen bastap oblys ortalyǵyndaǵy kóp qabatty úıler aýlalary men podezderdi dezınfeksııalaý bastaldy.
- Keshe ǵana oblysqa taǵy 10 myń qosymsha test synamasy jetkizildi. Sonymen qatar, 2 laboratorııa ortalyǵy iske qosylady. Osynyń barlyǵy indettiń taralýyn tejep, halyqqa tıgizer zardabyn múmkindiginshe azaıtýdyń amaly, – deıdi oblys ákiminiń orynbasary.
Onyń aıtýynsha, osy qaýipsizdik sharalaryna shekeden qarap, baǵynǵysy kelmeıtinder de kezdesedi. Mysaly, tótenshe jaǵdaı jarııalanǵaly beri onyń rejımin buzǵan 40 dámhana men meıramhana, 22 jeke úı, 54 dúken ıesine shara qoldanyldy. Odan bólek oblys aýmaǵyndaǵy baqylaý beketteriniń de jumysyna kedergi keltiretinder joq emes. Indetpen kúres kópke ortaq mindet ekendigin túsinbeı, tártip buzǵandardyń bárine shara qoldanyldy.