Qyzylordalyq kásipker koronavırýs juqtyrǵan naýqastardy emdep júrgen dárigerlerdi óziniń qonaqúıine ornalastyrdy. Qonaqúıde medısına qyzmetkerleriniń tynyǵyp, demalýyna bar jaǵdaı jasalǵan. Úsh mezgil tamaq berilip, bólmeleri zalalsyzdandyrylyp turady.
"Munda dárigerlerge jáne orta, kishi býyn mamandaryna qolaıly jaǵdaı jasalǵan. Olar jatyn orynnan bólek qorǵanysh quraldarymen qamtamasyz etilgen. Jumystan keıin úılerine qaıtpaı, arnaıy medısınalyq kólikpen osy qonaq úıge jetkiziledi",- dep habarlady oblystyq densaýlyq saqtaý basqarmasy.
Jalpy qonaqúıde koronavırýspen kúresip júrgen 100-den astam dáriger ornalastyrylǵan. Olarǵa kópbeıindi oblystyq aýrýhananyń 7 mamany qyzmet kórsetedi. Bul mamandar tazalyq, zalalsyzdandyrý jumystaryn júrgizýmen qatar, indetpen kúresýshilerdiń dene qyzýyn ólshep, medısınalyq tekseristen ótkizedi.