Torańqul kóli Soltústik Qazaqstandaǵy úlken sý qoımalarynyń biri. Onyń kólemi 35 sharshy shaqyrym. Jazy-qysy onyń boıynda balyqshylar qaptap otyrady, óıtkeni balyǵy mol, qazaqtyń qunarly kólderiniń biri.
Qazir muz ábden juqarǵan, keıbir jerdlerde satyrlap túsip, seń júrip jatyr. Soǵan qaramaı bes ashkóz balyqshy kóldiń ortasyna taman baryp, balyq aýlap otyrǵandarynda muz túsip ketken. Seńde qalǵan balyqshylar janushyryp, qutqarýshylardy shaqyrady. Qudaıǵa shúkir, qazir qaltafon bar, áıtpese qutqarýshylar árbir balyqshyny ańdyp otyrmaıdy ǵoı.
Kól jaǵasyndaǵy Korneevka selosynda turatyn qutqarýshy Vıacheslav Iаkovlev dabyl túsken boıynda, balyqshylardy qutqarý úshin motorly qaıyǵyn traktormen ákelip, kólge qoıyp ketedi. Al balyqshylardyń seńi bul ýaqytta jaǵadan alystaı beredi. Jandary muryndarynyń ushyna kelgen balyqshylar aıǵaılap, jan daýystary shyǵady. Shamamen jarty shaqyrymdaı júzgende ǵana qaıyq olarǵa jete alady. Tabıǵattyń dúleı kúshimen arpalys bir jarym saǵattaı ýaqytqa sozylady. Deneleri jeńil jas emes, 55 pen 72 jastyń arasyndaǵy qartań balyqshylardyń qaıyqqa minýi de bir qııamet bolady. Olar ózderiniń sýǵa ketkenimen qoımaı, qaıyqty da batyryp jibere jazdaıdy.
Áıteýir, 20 jyldan beri qutqarýshy bolyp istep júrgen Vıacheslav Iаkovlev olardy tegis qaıyqqa otyrǵyzyp, jaǵaǵa alyp shyqqan. Apatty jaǵdaıdy elemegen ashkóz balyqshylardyń oǵan aıtar alǵystary sheksiz.
Soltústik Qazaqstan oblysy