Koronavırýs pandemııasyna baılanysty álemde barlyq sporttyq básekeler toqtaǵan soń, túrli uıymdar jankúıerlerdi zeriktirmeý maqsatynda vırtýaldy jarystar ótkize bastady. Solardyń ishinde Dúnıejúzilik boks sýperserııasy da kásipqoı bokstan onlaın týrnır uıymdastyrýda.
Onlaın týrnırdiń kezekti bir básekesinde Maık Taıson men kásipqoı bokstyń ótken ǵasyrdaǵy eń úzdik boksshysy Mohammed Álı «judyryqtasyp», alǵashqysy jeńiske jetken. Biraq BAQ ókilderine bergen suhbatynda Taıson kishipeıildik tanytyp, shynaıy jekpe-jekte Álıden jeńiletinin moıyndaǵan.
«Bul týrnır týraly estigenim bar. Bálkim vırtýaldy básekede men jeńiske jetken shyǵarmyn, biraq shynaıy kezdesýde sózsiz Mohammed Álı jeńiske jetetin edi. Mohammed – álem boks tarıhyndaǵy eń úzdik boksshynyń biri», deıdi ol. Kásipqoı boksta Mohammed Álı 61 jekpe-jek ótkizip, 56 márte jeńiske jetse, Taıson 58 kezdesýiniń 50-inde qarsylasynan basym túsken.
Aıta keteıik, aty ańyzǵa aınalǵan boksshy Mohammed Álı 2016 jyly 74 jasynda dúnıeden ótti. Ol uzaq jyldar boıy Parkınson dertimen aýyrdy. 1960 jyly áýesqoı boksta Rım Olımpıadasynda top jaryp, keıinnen kásipqoı boks sportynda baq synady. Mohammed ázirshe kásipqoı boks tarıhynda aýyr salmaqta úsh márte álem chempıony atanǵan jalǵyz adam.