Búgin koronavırýs oshaǵy bolǵan Ýhan qalasy 76 kúnge sozylǵan karantınnen soń ashyldy. Dál osy ýaqytta Elbasy maqalasy jarııalandy.
Baýyrjan Momyshulynyń «Tártipsiz – el bolmaıdy, tártipke bas ıgen el qul bolmaıdy» degen qanatty sózin mysalǵa keltirgen maqaladan túıgenimiz, biz qazir ult bolyp jumylyp, birligimizdi arttyryp, dúnıe júzi boıynsha 1,4 mıllıonnan astam jan syrqatqa shaldyqqan dertti jeńip shyǵýymyz kerek.
Kóńilge medeý bolatyny – Qazaqstan qaýipti derttiń aldyn alýǵa álem elderiniń eń alǵashqylarynyń biri bolyp kiristi jáne shettegi azamattaryn qaldyrǵan joq. Arnaıy reıster uıymdastyrylyp, túrli elderde tarydaı shashylǵan azamattarymyz túgel elge oraldy.
Prezıdent Qasym-Jomart Kemeluly Toqaev halyqqa arnaǵan taıaýdaǵy úndeýinde barlyq áleýmettik toptarǵa, kásipkerlerge, aýyl sharýashylyǵy salasyna kórsetiletin alýan túrli kómek týraly jan-jaqty aqparat berdi. Aqparat demekshi azamattarymyz qazir jańa tehnologııalar men túrli aqparat kózderi týraly tolyqqandy bilip ony meńgerip jatqan sekildi. Sebebi qazirgi zaman osyny talap etýde.
Úndi halqynyń uly gýmanıst qaıratkeri Mahatma Gandıdiń «Álemdi ózgertý úshin áýeli ózimiz ózgerýimiz kerek» degen sózin mysalǵa keltirgen Elbasy óz maqalasynda mańyzdy máseleni atap kórsetti. «Dál qazir búkil adamzat jolaıryqta tur. Álemdik geosaıasatty, ekonomıkany, ekologııany, qoǵam ómiriniń san alýan salasyn qamtyp, tizbektele kelgen, buryn-sondy bolmaǵan problemalar álem memleketteriniń qarym-qatynasyn da ózgerte bastady» dedi Elbasy.
Biz bul indetti mindetti túrde jeńip shyǵamyz. Biraq Álem endi burynǵydaı bolmaıdy.
Oljas BERKINBAEV,
saıasattanýshy