Qyzyljar qalasy men Beskól selosynyń arasy 10 shaqyrym. Karantın talaby boıynsha qazir qaladan shyǵýǵa bolmaıdy. Tek tranzıttik júk mashınalary men azyq-túlik tasıtyndarǵa ǵana ruqsat etilgen. Biraq soǵan qaramaı Petropavldyń úsh turǵyny «Kia Spectra» avtokóligimen Beskólge jol tartqan. Olardy polıseıler № 1 blok-bekette toqtatyp, Beskólge barýǵa bolmaıtynyn aıtady. Alaıda jigitter Beskóldiń ar jaǵyndaǵy Báıterek aýylyna dostarynyń monshasyna jýynýǵa bara jatqandaryn aıtady. Polıseıler karantın kezinde qalaǵa kirip-shyǵýǵa bolmaıtynyn túsindiredi.
О́zderin jibermeıtindigine kózi jetken seriler keri burylsa da Petropavl qalasy mańynda trassadan túsip, aýyl arasyndaǵy qara jolmen shyǵyp ketpek bolǵan. Blok-bekette kezekshilikte turǵan saqshylar olardy baıqap qalyp, karantındik aýmaqtan shyqqanǵa deıin toqtatady. Medısınalyq kýálandyrý jolaýshylardyń mas emes ekenin kórsetken.
«Endi barlyq tórt jigitke qatysty Ákimshilik quqyq buzýshylyq týraly kodeksiniń 476-baby «Tótenshe jaǵdaı rejimin buzý» boıynsha materıal jınaldy», - deıdi Qyzyljar aýdany polısııa bóliminiń bastyǵy, polısııa polkovnıgi Álıhan Baıqadamov. – «13 sáýir kúni Qyzyljar aýdandyq soty Beskól aýylynyń 1988 jyly, Petropavl qalasynyń 1990 jáne 1991 jyldary týǵan turǵyndaryn úsh táýlikke qamaqqa alý týraly sheshim shyǵardy. Karantın kezindegi saqtyq sharalary azamattardyń densaýlyqtary men ómirlerin saqtap qalýǵa, sondaı-aq qaýipti ınfeksııanyń taralyp ketpeýine baǵyttalǵanyn adamdar esterinen shyǵarmaýlary qajet», deıdi polkovnık.
Sóıtip, karantınniń talabyn eskertýge qaramaı oryndamaǵandardyń túrmeniń dámin tatatyn boldy.
Soltústik Qazaqstan oblysy