Qostanaılyq Vladımır Aksenov Tobyl ózeniniń jaǵalaýyndaǵy saıajaı mańyndaǵy úılerdiń birinde turady.
Uzaq qashyqtyqqa júk tasymaldaıtyn kólik júrgizýshisi qoly bosaǵanda otbasymen birge ózen jaǵasyna serýenge shyǵýdy ádet etken. Osyndaı demalys kúnderiniń birinde ol sýǵa batyp bara jatqan qyz balany qutqaryp qaldy. Bolǵan jaıdy Vladımırdiń ózi baıandap berdi: - Otbasymyzben birge Tobyl jaǵasynda serýendep júr edik, kópirdiń ústine bir avtokólik kilt toqtap, apat belgisin qosty. Kólik júrgizýshisi máshınesinen shyǵa saldy da, kópirdiń shetine qaraı júgirdi. Atynsha daýystap kómekke shaqyra bastady. Men ózen jaǵasyna tústim de, sý ortasynda basy ǵana kórinip turǵan qyzdy baıqadym. – Jaǵalaýǵa júzip kele alasyń ba? – dep surap edim, qyz: - Joq, júze almaımyn - dedi. Dereý kúrtemdi sheshtim de, áıelimdi úıden súlgi alyp kelýge jumsap, ózim sýǵa súńgidim. Qyzǵa júzip jaqyn bardym da, ary-beri julqynbaı denesin bos ustaýyn suradym. Osylaısha aman-esen jaǵaǵa alyp shyqtym, - dedi beıbit kúnniń batyry.
Búgin oblystyq polısııa departamentiniń basshylary Vladımır Aksenovke QR IIM-niń logotıpi bederlengen arnaýly saǵat tabys etip, syn sátte kórsetken erligi úshin alǵys bildirdi.
Qostanaı oblysy