YouTube jelisinde «Aýlkemp» balalar etno-lagerin ashpaq bolǵan úsh dos týraly tanymal otandyq franshızanyń jalǵasy retinde túsirilgen «Kanıkýly off-line 2» otbasylyq komedııasynyń lısenzııalyq nusqasy jaryq kórdi.
Bir táýlik ishinde 1 mıllıon qaralym jınap úlgergen fılmniń birinshi nusqasyn komanda byltyrǵy jyldyń sońynda jelige júktegen edi. Birinshi bólim 6 mıllıonnan astam qaralym jınaǵan.
«Bul búkil otbasyǵa arnalǵan kıno. Qazirgi tańda balalarǵa arnalǵan sapaly kontent tek kınoekrandarda ǵana emes, sonymen qatar Internet keńistiginde jáne YouTube jelisinde de joqtyń qasy. «Kanıkýly off-line» fılminiń eki bólimi de qazaq tiliniń damýyna úlken úles qosady. Balalarǵa bizdiń salt-dástúrimiz, mádenıetimiz, ulttyq oıyndarymyz jáne turmysymyz týraly qyzyqty aıtylǵan. Sondyqtan, dál karantın kezinde úıde otyrýdyń mańyzdy bolyp tabylatyn kezeńinde komanda bolyp fılmdi qoljetimdi jelige júkteýdi jón kórdik», - deıdi fılmniń rejısseri jáne Almaty qalasy mádenıet basqarmasynyń basshysy Ernar Qurmashev.
Fılmniń sıýjeti boıynsha, bas keıipker Qaırat ınvestorlardyń usynysyn qabyldap, iri holdıngke basshylyq qyzmetine otyrady. Al «Aýlkemp» lagerinde óziniń ebedeısiz dostary Dastan men Bolatty qaldyrady, olar bolsa birinshi kúni-aq urysyp, lagerdi ekige bólip, bir-birine qarsy qoıady. Dastan Bolat atty «úlken» balalar aýylda bir kún de bolyp kórmegen qalalyq erke balalardyń jańa tobyna ıe bola alar ma eken?
Fılmniń komandasy «Aýlkemp» syndy lagerdi tek kınoda ǵana emes, naqty ómirde de ashqanyn atap ótý kerek. Almaty oblysynyń mańynda qurylǵan osyndaı lagerlerdiń biri ótken jazda alǵashqy týrısterdi qabyldady. Lager ishki otbasylyq jáne balalar-jasóspirimder týrızmin damytýdyń ajyramas bóligi boldy. Úsh aı boıy «Aýlkemp» tárbıelenýshileri arnaıy ázirlengen baǵdarlama boıynsha qazaq tilin meńgerip, ulttyq mádenıetimizdi úırendi. «Aýylkemp» kishkentaı azamattardyń patrıotızmi men maqtanyshynyń ósýine óz úlesin qosa otyryp, óziniń tárbıe jumysyn bolashaqta da jalǵastyrady.
Demalys týraly fılm keıipkerleriniń tarıhy ınternet pen áleýmettik jelisiz aıaqtalmaıdy. Karantın aıaqtalǵannan keıin birden úshinshi bóliminiń túsirilimi bastalmaq.