Bıylǵy qardyń kóptigine qaraǵanda soltústikte tasqyn sýy qatty bolar degen ábiger kóp bolǵan edi. Biraq áıteýir, tym bolmasa osy taraptaǵy qysym birshama tómen.
Degenmen, TJ departamentiniń qyzmetkerleri árqashanda qyraǵy qalpynda. Olardyń sońǵy málimetterine qaraǵanda óńirdiń ońtústik-batys aýmaqtaryndaǵy jaǵdaı birshama kúrdeli. Sharyq, Jembaraq ózenderiniń sýlary Chıstopole men Rýzaevka aýyldarynyń shetki úılerine jetip qalǵan. Biraq ýaqytynnda jetkizilgen ınjenerlik tehnıkalardyń kúshimen sýdyń baǵyty ózgertilip, aǵys joldary tazalanyp, apattyń aldy alyndy.
Táýlik boıy úzilissiz júrgizilgen jumystardyń nátıjesinde Tımırıazev aýdanyndaǵy aýyldardy da sý basý qaýpi joǵaldy. Munda motopompalardyń kúshimen qar sýlary jaıylyp, qateri tómendetildi. Bul baǵyttaǵy qutqarý jumystaryna TJ departamentiniń 53 qyzmetkeri jáne jergilikti bılik organdarynyń 50 mamany qatystyryldy. Qazir Aıyrtaý men Ǵ.Músirepov aýdandaryndaǵy shaǵyn ózender sýlarynyń da kóterilýi deńgeıi tómendedi. Endi barlyq nazar Sergeev sý qoımasyna aýǵan.
Qarǵyn sýy bastalǵannan beri oblys aýmaǵyndaǵy respýblıkalyq, jergilikti mańyzy bar 40 joldy sý shaıǵan edi. Qazir sonyń 36 qalpyna keltirildi. Oblystyń barlyq gıdrotehnıkalyq qurylystary qalypty jaǵdaıda jumys isteýde. Osydan eki kún buryn oblystyq TJ bastyǵynyń orynbasary N.Atyǵaev Sergeev sý qoımasyndaǵy sý deńgeıiniń kóterilýi 165 sm degen edi, sońǵy aqparat onyń taǵy bes sm-ge tómendegenin jetkizdi. Bul qoımadaǵy sýdyń eń joǵary kóterilgen rekordy 2017 jyly bolǵan. Onda sý 332 sm-ge kóterilgen. Al bıyl eń kóbi 195 sm-ǵa kóterildi.
Alaıda Esildiń Qyzyljar qalasynyń túbindegi qaýpi áli de zor. Sonyń kesirinen qala mańyndaǵy Zarechnyı kentindegi úıler men Mıchýrıno jáne Prıbrejnoe aýylyna baratyn joldar shaıylýy múmkin.
Soltústik Qazaqstan oblysy