Sońǵy 10 kún boıy Soltústikte indetke ushyraǵandar sany artpaı, turaqty bolyp turǵan edi. Biraq keshe Aqjar aýdanyna aýylsharýashylyq máselelerimen Aqmola oblysynan kelgen bir azamattyń boıynan da indet shyǵyp, oblys halqy alańdap qaldy.
Aýa-raıynyń kúrt jylyp ketýine oraı Qyzyljar halqy da jaǵany jaılaýǵa salyp, kóshelerde kórine bastaǵan edi. Sonyń kesirinen sońǵy eki kúnde ǵana óńirde 151 adam karantın rejimin buzǵany úshin ustalǵan. Sonyń ishinde 120 adam tek Petropavl qalasynan bolǵan. Endi jańa indettiń taǵy bas kótergeni halyqty oılantyp tastady. Osynyń ústine kesheden beri Soltústik halqyn taǵy bir jańalyq qatty tolqytyp tur. Búgin Londonnan Petropavldyń halyqaralyq áýejaıyna júz shaqty jolaýshysy bar ushaq kelip qondy. Bular sol elde qalǵan Qazaqstan azamattary eken.
Oblys ákiminiń orynbasary Rýslan Álishevtiń aıtýyna qaraǵanda jolaýshylar tegis sanıtarlyq-epedemııalyq qaýipsizdik sharalarymen qamtylyp, eshkimmen aralastyrylmaı, birden Petropavl qalasynyń qonaqúıine jetkiziledi. Mundaı olar jáne ekıpaj músheleri eki kún boıy qatań baqylaýǵa alynyp, boılarynda indettiń bar-joǵy tekseriledi. Sonymen birge aınalaǵa kúzet qoıylyp, qonaqúıge eshkimdi jaqyndatpaıdy. Jolaýshylar tegis aqy-pulsyz tamaqtandyrylady. Eger boılarynan indettiń izi bilinbese turaqty mekenderine jiberiledi.
R.Álishev atamaǵanymen búgin qalyń kópshilikke jolaýshylardyń qandaı qonaqúıge túsetini belgili boldy. Ol Qyzyljardyń qaq ortasyndaǵy, jaıaý halyq barynsha kóp júretin saıabaqtyń aldynda ornalasqan «Qyzyljar» qonaqúıi eken. Karantın desek te jumysqa baratyn halyq onyń aldynan kóp ótedi. Sondyqtan turǵyndar Londonnan kelgen qonaqtardyń bul qonaqúıge ornalastyrylǵanyna narazy ekendikterin áleýmettik jelilerde jarysa jazyp jatyr...
Soltústik Qazaqstan oblysy