Jankúıerdi mazalaǵan suraq kóp

Qazir dúnıe júzi elderiniń úkimeti barlyq jumysyn ysyryp qoıyp, tótennen kelgen koronavırýs pandemııasymen kúresip jatyr. Al qaýiptiń kúsheıgenin sezgen tiri pendeniń bári myna indetten tezirek qutylý úshin karantınde otyr. Táýliktiń jarty­synan kóbin alańda, jattyǵý zalynda ótkizetin fýtbolshylarǵa da ka­rantın ońaıǵa soqpaǵany anyq. Alǵashynda ish pysqannan túrli fleshmob uıymdastyryp edi, qazir jaǵdaı kúrdelengen soń barlyǵy bolmasa da, birazy túrli qaıyrymdylyq sharalaryna qatysyp, jalaqylarynyń qysqarýyna kelisip otyr. Osy oraıda, jankúıerlerdiń «fýtbol maýsymy jalǵasa ma?» degen saýalyna jaýap izdep, Eýropanyń negizgi chem­pıo­nattarynyń qazirgi jaǵdaıyn anyq­tap kórdik.

Anglııa

Eger fýtboldan bıylǵy maýsym osy kezeńmen aıaqtalar bolsa, APL eń kóp shyǵynǵa batady. Sondyqtan qazir bul elde maýsymdy aıaqtaý týraly usynys kóp talqylanyp jatqan joq. Sebebi joǵaryda aıtqandaı klýbtar orasan zor shyǵynǵa batady. Sońǵy málimet boıynsha Anglııa chempıonaty mamyrda bastalady dep josparlanýda. Áýelde ishki chempıonat 5 sáýirge deıin toqtaǵan bolatyn. Keıin 30 sáýirge deıin sozylǵan-dy.

Tipti APL-diń bir komandasy bi­rin­­shiliktiń qalǵan týryn vırýstan qaýipsiz elde, mysaly Qytaıda ót­kizýdi usynǵan. Biraq qalǵan 19 komanda usynysty qoldamady. Qazir bul elge Anglııa kýbogy oıyndary kedergi keltirse de, jalǵastyrý mańyz­dy. О́ıtkeni Anglııanyń tómengi lıgalarynda baq synaıtyn komandalar úshin bul mańyzdy týrnır. Dál osy kýbok oıyndary arqyly olar APL-diń TOP klýbtarymen kezdesip, mol tabysqa keneledi.

Chempıonatta «Lıverpýl» ekinshi orynda kele jatqan «Manchester Sıtı» klýbynan 25 upaı alda tur. Taǵy

6 upaı oljalasa, bıyl chempıon atanady. Al Anglııa kýbogynda shırek fınalǵa shyqqandar anyqtalyp qoıǵan. «Tot­tenhem» men «Lıverpýlden» bólek, barlyq TOP komandalar jarysty jalǵastyrýda.

Ispanııa

Ispanııa fýtbolynyń basshylyǵy týrnırdi 29 mamyrda jalǵastyrýdy kózdep otyr. Matchtar ár 72 saǵat saıy­n jankúıerlersiz ótedi dep josparlanýda. Al klýbtar jankúıerlerdiń qaty­sýynsyz ótkize berýge qarsy emes. AS basylymynyń málimetinshe, Lıga barlyq klýbtarǵa maýsymdy jalǵas­tyrý úshin daıyndyqty bastaýǵa, karantınnen soń bastalatyn jattyǵýǵa qajetti usynystardy jibergen. Is­panııa chempıonatynda 27 týrdan keıin 58 upaımen «Barselona» birinshi orynda keledi. «Real» klýbynda 56 upaı bar. La Lıgada áli oınalmaǵan 11 týr bar.

Italııa

Eýropada pandemııanyń oshaǵyna aınalǵan Italııada qazir jaǵdaı turaq­talyp keledi. Alǵash A Serııasyndaǵy oıyndary 24 mamyrda jalǵasyn tabady dep habarlaǵan bolatyn. Biraq sońǵy málimetterge qaraǵanda bul ýaqyt ta belgisiz merzimge shegerildi.

«Maýsymdy máresine jetkizý bas­ty maqsatymyz bolyp tur. Jospar boıynsha mamyr aıynyń sońynda nemese maýsymnyń basynda fýtboldy jalǵastyrýymyz kerek. Dese de jaǵdaı ózgerip, bul merzim tamyz nemese qyrkúıekke de qalyp ketýi múmkin. Bir anyǵy, bıylǵy maýsymdy aıaqtap, kelesi jylǵy birinshilikti keshiktirip bolsyn bastaımyz», dedi Italııa fýt­­bol federasııasynyń prezıdenti Gabrıele Gravına.

Italııanyń A serııasy Eýropa el­de­rinde birinshi bolyp 9 naýryzda oıyn­­dardy toqtatqan bolatyn. Qazir Ita­lııada oınalmaǵan 12-13 týr qaldy. Týr­nır kestesinde «Iýventýs» 63 upaı­men kósh bastap tursa, «Lasıo» 62 upaı­men Týr­nır komandasyn ókshelep keledi.

Germanııa

Germanııa fýtbol assosıasııasynyń málimetinshe, chempıonattyń kelesi týr oıyndary mamyr aıynyń basynda bas­talady. Biraq ol úshin komandalarǵa birqatar shart pen talap qoıylǵan. Barlyq fýtbolshy Covid-19 boıynsha test tapsyrady. Eger de bireýinen oń nátıje shyǵatyn bolsa, búkil komanda emes, tek fýtbolshynyń ózi karantınge jatqyzylady.

Týrnırdi jalǵastyrý úshin komandada keminde 13 fýtbolshy jáne eki qaqpashy bolý kerek. Eger bir komanda joǵarydaǵy talapqa saı kel­mese, ol komandaǵa tehnıkalyq je­ńilis jazylady. Barlyq oıyndar jankúıersiz ótedi. Lıga basshy­sy Krıstıan Zaı­ferttiń aıtýynsha, maqsat – 30 maý­symǵa deıin birin­shilikti aıaqtaý. О́ıt­keni sol kúni kóp fýtbolshynyń keli­simsharty aıaq­talady.

Býndeslıgada 25 týrdan keıin «Bavarııa» 55 upaımen birinshi orynda keledi. 51 upaıy bar «Borýssııa D» ekinshi orynda tur.

Qazaqstan

Mádenıet jáne sport mınıstri Aqtoty Raıymqulova jýyrda Ortalyq kommýnıkasııalar qyzmetinde ótken baspasóz máslıhatynda sporttyq jarystar qashan jalǵasatynyn aıtqan bolatyn. «Qazirgi tańda barlyq sport­tyq jarystar eldegi tótenshe jaǵdaıǵa jáne ka­rantınge baılanysty ýa­qytsha toqtap tur. Sondaı-aq birqatar doda jyldyń ekinshi jartysyna aýys­tyryldy. Sporttyq básekeler qashan­nan bastap jalǵasyn tabatynyn tap basyp aıta almaımyz. О́ıtkeni barlyǵy qazirgi karantındik jaǵdaıǵa baılanysty», dedi A.Raıymqulova.

Bıylǵy el birinshiligi 7 naýryzda bastalyp, 16 naýryzda koronavırýs pandemııasyna baılanysty toqtady. Osy ýaqyt aralyǵynda komandalar nebári eki-aq týr oınady. Alǵashqy týr oıyndary qalypty jaǵdaıda ót­se, ekinshi týr jankúıersiz ótti. Eki týr qorytyndysy boıynsha «Astana» kósh bastap keledi. Jospar boıynsha oıyn­dar 15 sáýirden bastalady dep kútilýde.

Ýefa

Eýropa fýtbol qaýymdastyǵy ko­mandalarǵa maýsymdy jalǵastyrý úshin barlyq jaǵdaı jasap jatyr. Atap aıtar bolsaq, ÝEFA naýryz ben maýsym aıynda ótetin ulttyq qura­malardyń oıynyn keıinge she­gerdi. Bıyl ótýi kerek bolǵan «Eýro-2020» chempıonatyn kelesi jylǵa aýystyrdy. Sonymen qatar Chempıondar lıgasy men Eýropa lıgasyn da óz má­resine jetkizýdiń de múmkindikterin qarastyryp jatyr.

Jýyrda ǵana chempıonatyn aıaqtap, jeńimpaz komandany marapattaǵan Belgııaǵa eskertý jasady. Eger basqa elder de týrnırdi aıaqtaıtyn bolsa kelesi jylǵy Eýrokýbok básekelerine qatystyrylmaıtynyn aıtty.

Qoryta aıtqanda, Eýropa elderiniń barlyǵy ishki chempıonattaryn jal­ǵastyrǵysy keledi. Biraq eshbir el naqty kún men anyq josparyn aıta al­maı otyr. Dese de Eýropada ótetin eń alǵashqy resmı oıynnyń naqty kúni belgili bolǵanda bir-birimizdi qut­tyqtaımyz. Tek mıllıondardyń oıyny bastalǵany úshin emes, koronavırýs indetin jeńgenimizge.