Sońǵy kúnderi Syr boıynda indettiń irge jaıýy toqtaǵandaı bolyp kórinip edi. Búgin tańerteń brıfıng ótkizgen oblystyq densaýlyq saqtaý basqarmasynyń basshysy Jaqsylyq Ábdisámetov kesheli beri óńirdegi naýqastar sanyna taǵy 5 adam qosylǵanyn habarlady.
- Shıeli men Syrdarııa aýdanynan tirkelgen 4 naýqas buryn naýqastarmen qarym-qatynasta bolǵandar retinde karantınge jatqyzylǵandar arasynan anyqtaldy. Al Jańaqorǵan aýdanyndaǵy jańa oshaq bolyp otyr. Qazir onda tıisti jumystar jasalýda, – dedi oblystyń bas dárigeri.
Jańadan tirkelip otyrǵan naýqastar 26 men 61 jas aralyǵyndaǵy óńir turǵyndary. Ekeýi er adam, úsheýi áıel.
Jalpy oblysta vırýs juqtyrǵandar sany osymen 124 bolyp otyr. Olardyń ekeýi emdelip shyqty, biraq belgili bir merzimge deıin dárigerler baqylaýynda bolady.