Memlekettik satyp alýlar aıasynda ónim jetkizýmen aınalysqan kásipkerlerge TJ rejımine baılanysty jetkizýlerdi ýaqytynda júzege asyrmaǵany úshin aıyppul qoldanylmaıdy.
Qazaqstan kásipkerleriniń quqyqtaryn qorǵaý jónindegi ýákil Rýstam Júrsinov óziniń Facebook-tegi paraqshasynda 12 naýryzdan bastap kásipkerlerden 30,3 myńnan astam ótinish (saýalnama, call-ortalyq, jazbasha ótinishter men áleýmettik jeliler) túskenin habarlady. О́tinish bildirgenderdiń 60%-y engizilgen shekteýlerge baılanysty sharttyq mindettemelerdi buzýǵa májbúr bolǵanyn habarlady.
Memlekettik satyp alýlar, sondaı-aq kvazımemlekettik sektor sýbektileriniń satyp alýlar sharttary sheńberinde taýarlardy jetkizýdi júzege asyratyn (jumystardy oryndaıtyn, qyzmetterdi kórsetetin) kásipkerler ózderin mazalap júrgen suraqtardy qoıdy. Memleketpen jasalǵan kelisim-sharttar talaptarynyń eń eleýsiz buzylýynyń ózi ósimaqy tóletý men eki jylǵa qara tizimge engizý qaýpin týdyrady.
Bıznes-ombýdsmen kásipkerlerden alǵashqy ótinishter legi túse bastaǵanda-aq Úkimetke memlekettik organdarmen jáne kvazımemlekettik sektormen jasalǵan shart mindettemelerin buzǵany úshin bıznesti jaýapkershilikten bosatý qajettiligi týraly usynystardy daıyndaý qolǵa alynǵandyǵyn aıtyp ótti.
Rýstam Júrsinov 23 naýryzda Prezıdent Tótenshe jaǵdaılar jónindegi memlekettik komıssııanyń otyrysynda sóılegen sózinde «memlekettik organdar men kvazımemlekettik kompanııalar aıyppul sanksııalaryn óndirip almaýy jáne eger sharttyń oryndalmaýy ekonomıkadaǵy aǵymdaǵy keleńsiz qubylystarǵa baılanysty bolsa, jetkizýshini josyqsyz jetkizýshiler tizilimine engizbeýi tıis», dep atap ótkendigin eske saldy.
«Jaqyn arada Prezıdenttiń tapsyrmasyn oryndaý úshin memlekettik satyp alýlar boıynsha Úkimet qaýlysy qabyldanady dep kútip otyrmyz. Eger elde engizilgen shekteýlerge baılanysty mindettemelerdi buzýǵa jol berilgen bolsa, bıznes TJ rejımi jaǵdaıynda memlekettik satyp alýlar boıynsha jetkizýge qatysty shart taralptaryn buzǵany úshin jaýapkershilikten bosatylýy tıis», dep atap ótti Qazaqstan kásipkerleriniń quqyqtaryn qorǵaý jónindegi ýákil.