Memleket basshysy Qasym-Jomart Toqaev Qostanaı oblysy ákimimen telefon arqyly sóılesti. Arhımed Muhambetov Prezıdentke aımaqtyń sanıtarlyq-epıdemıologııalyq ahýaly men karantın jaǵdaıynda indetke qarsy kúres sharalarynyń qalaı júzege asyrylyp jatqany týraly baıandady. Sondaı-aq, oblys turǵyndaryn áleýmettik qoldaý, shaǵyn jáne orta bıznestiń birtindep qaıta jumysqa kirisýin qamtamasyz etý, kóktemgi egin jumystary jáne jumyspen qamtýdyń jol kartasyn júzege asyrý boıynsha Prezıdent mindettegen tapsyrmalardyń iske asyrylýy týraly esep berdi.
Aımaq basshysynyń baıandaýynsha, búginge deıin Qostanaı oblysynda indetke qarsy kúresý jáne onyń aldyn alý maqsatynda 1 228 medısınalyq tósek-oryn jabdyqtalǵan. Aldyn ala bekitilgen josparǵa sáıkes koronavırýs indetin anyqtaý maqsatynda 3376 zertteý júrgizildi. 1068 adam úı karantıninde jatyr. Infeksııanyń odan ári taralýyna jol bermeý maqsatynda 17 sáýirde saǵat 00:00-den bastap aımaqta karantın jarııalandy. Karantın tártibin 29 tosqaýyl beketi, 33 mobıldik patrýl jáne 300-den astam jaıaý polısııa qyzmetkeri qamtamasyz etedi. Karantınniń alǵashqy eki kúni polısııa shekteý sharalaryn saqtaý jóninde turǵyndarǵa túsindirý jumystaryn júrgizetin bolady. Sodan keıin TJ rejımin buzǵany úshin aıyppul sanksııalaryn qoldana bastaıdy. TJ rejımi bastalǵannan beri 408 quqyq buzýshy ákimshilik jaýapkershilikke tartyldy, onyń 40-y qamaýǵa alyndy.
Sondaı-aq, Arhımed Muhambetov Memleket basshysyna sharýashylyqtardyń kóktemgi dán sińirý naýqanyna daıyndyǵy jóninde baıadady: - Qostanaı oblysy kóktemgi egiske tolyq daıyn. Jaqyn kúnderi jer óńdeý, ylǵal jabý jumystary bastalady. Aýyl sharýashylyǵy qurylymdary tuqymmen tolyq kólemde qamtamasyz etilgen. Kóktemgi egis jumystaryna 22,9 myń traktor, 1032 dán ekkish keshen jumyldyrylmaq. Tehnıka 100% daıyn. Oblys boıynsha 71 myń tonna arzandatylǵan JJM bólindi, jetkizý kestege sáıkes júzege asyrylady. «Agrarlyq nesıe korporasııasy» AQ arqyly egis jumystaryn nesıelendirýge 25,9 mlrd teńge bólindi, - dedi oblys ákimi.
A.Muhambetov pandemııa kesirinen tabysyn joǵaltqandardy áleýmettik qoldaý sharalarynyń qalaı júzege asyrylyp jatqanyna da toqtaldy. Búgingi kúni 117 260 azamatqa 5 mlrd teńge somasynda áleýmettik tólem taǵaıyndaldy. Jumyspen qamtýdyń jol kartasy aıasynda ınfraqurylymdyq jobalardy iske asyrýǵa shamamen 54 mlrd teńge bólindi. Oblysta 13 myńnan astam jumys orny qurylady. Jumyspen qamtýdyń jol kartasy tótenshe jaǵdaı kezinde bizdiń oblystyń 6,7 myńnan astam turǵynyn 85 myń teńgeden kem emes mólsherde tabyspen qamtamasyz etýge múmkindik beredi, - dedi oblys ákimi.
Aımaq basshysynyń esebin tyńdaǵan Prezıdent A.Muhambetovke birqatar naqty tapsyrmalar júktedi, - dep málimdedi Qostanaı oblysy ákiminiń baspasóz qyzmeti.
Qostanaı oblysy