Bul oqıǵa jýyrda Petropavl qalasyndaǵy bir úıdiń aýlasynda boldy. Nazarbaev kóshesindegi 225 úıdiń turǵyndary aıǵaı-uıǵaı, shań-shuń shyǵyp, bireýlerdiń tóbelesip jatqanyn kórip, dereý 102 nómirge dabyl túsirgen. Ony estigen boıynda sol jerge jaqyn mańda júrgen polısııa narıady aldymen jetedi.
Polısııanyń kelgenin kórip tóbelesip jatqandardyń biri óziniń buzaqylyq áreketterin toqtatqan. Al araqtyń qyzýynan shalyqtap ketken áıel men taǵy bir er adam ózderiniń qoǵamdyq jerdegi óreskel áreketterin odan ári jalǵastyryp, aýyzdarynan aq ıt kirip, qara ıt shyǵyp, tipti judyryqtaryn da jumsaýdy toqtatpaǵan. Polısııa qyzmetkerleriniń eskertýlerin de qulaqtaryna qystyrmaǵan. Tipti, polısııa qyzmetkerine de qol kótergen.
Basqa amaly qalmaǵandyqtan polısııa qyzmetkerleri olardyń qoldaryn burap, mashınanyń qorabyna kúshpen salýǵa májbúr bolǵan. Osynyń bári sol jerdegi kameranyń jazýyna da túsip qalǵan. Biraq soǵan qaramaı keıbir keraýyzdar polısııa qyzmetkerlerin artyq kúsh qoldandy dep aıyptaýda.
Osyǵan baılanysty polısııa qyzmetkerleri beınekórinisterdi kórsete otyryp, jýrnalısterge túsinik berdi. «Bul quqyqbuzýshylyq oqıǵasy azamattardyń bári úılerinde otyrýǵa tıisti karantın rejimi kezinde bolyp otyr. Qazirgi ýaqytta polısııa qyzmetkerlerine rejimdi buzyp, dalada júrgen jáne qoǵamdyq orynda quqyqbuzýshylyq áreketter jasaǵandarǵa qatań tártip talap etý quqy berilgen. Myna quqyqbuzýshylarǵa sot tıisti qatań jaza beretin shyǵar degen úmittemiz. Biz materıaldardy sotqa berýge ázirleýdemiz», dedi oblystyq polısııa departamenti bastyǵynyń orynbasary, polkovnık Marat Tólebaev.
Jurttyń bári ortaq qaýipten qorǵanyp, úılerinde otyrsa keıbir sanasyzdar osylaı kóshede tóbeles te uıymdastyrýda. Ondaıdy aqtaıtyndar neni kózdeıtini belgisiz.
PETROPAVL