Qostanaı oblysynyń ákimi Arhımed Muhambetov Qostanaı qalasyndaǵy «iKomek» jedel áreket etý jáne monıtorıng ahýaldyq ortalyǵynyń jumysymen tanysty. 2019 jyly ashylǵan ortalyqtyń basty mindeti - qaladaǵy qyzmet kórsetý sapasy men ómir súrý sapasyn barynsha arttyrý.
iKomek ortalyǵy turǵyndarǵa 1000-nan astam qyzmet túrin kórsetedi jáne qońyraý shalǵan adam óz saýalyna birden jaýap ala alady. Oblys turǵyndaryna yńǵaıly bolý úshin ońtaıly qyzmet kórsetý ortalyǵyna «109» biryńǵaı telefon nómiri berilgen. Osy nómirge qońyraý shalý arqyly kez kelgen turǵyn qala qurylymyna qatysty ózin mazalaǵan saýalǵa jaýap alady jáne kez kelgen oqys oqıǵa týraly habarlaı alady.
Azamattarǵa yńǵaıly bolý úshin ortalyq «109» nómirine qosa, Facebook, Telegram jáne WhatsApp áleýmettik jelileri arqyly jumys isteıdi.
Aıta ketý kerek, «iKomek» biryńǵaı baılanys ortalyǵy táýlik boıy jumys isteıdi. Ortalyqqa qazir negizinen karantın rejimine qatysty saýaldar kelip túsýde. Sońǵy eki kún ishinde «iKomek»-ke 5 myńnan astam ótinim túsip, onyń 3,8 myńy qanaǵattandyrylǵan.
Qostanaı oblysy