Ústimizdegi jyldyń alǵashqy toqsanyndaǵy ekonomıkalyq kórsetkishterdi qorytyndylaǵan oblys ákimdiginiń otyrysynda óńir basshysy Qumar Aqsaqalov ekonomıkanyń qalypty deńgeıde damyp kele jatqandyǵyn aıtty, sonymen birge ol aldaǵy ýaqytqa josparlanǵan sharalardy oryndaı berý kerektigin atap ótti.
Oblys ekonomıkasynyń damý barysy týraly baıandaǵan ekonomıka basqarmasynyń bastyǵy Arsen Qazybekov jyl basynan bergi ekonomıkanyń ósimi 2,4 paıyz, ıaǵnı 26,7 mlrd teńge bolǵanyn atap ótti. Sonymen birge ol árbir aýdannyń damý dınamıkasyna toqtalyp, ósimniń Qyzyljar aýdanynda tómen ekenin aıtty. Buǵan sebep bolǵan jumyrtqa óndirýdiń 30 paıyzǵa quldyrap ketkendigi jetkizildi. Et ónimderin shyǵarý oblysta osy kezeńde 6,6 paıyzǵa, sút 6 paıyzǵa artqan. Sonyń ishinde et óndirý Taıynsha, Aqqaıyń, Esil aýdandarynda, al sút ónimderin shyǵarý Mamlıýt, Aqqaıyń, Ǵ.Músirepov aýdandarynda artqan. О́nerkásip ónimderiniń óndirisi de 65,5 mlrd teńgege artyp otyr.
2020 jyldyń birinshi toqsanyndaǵy bıýdjet túsim bóligi de jospardaǵydan artqan, al shyǵys bóliginiń oryndalýy 99,2 paıyz. Bul týraly jıynda oblystyq qarjy basqarmasynyń bastyǵy Natalıa Dyshkant aıtty.
Otyrysty qorytyndylaǵan oblys ákimi Qumar Aqsaqalov «qalyptasyp otyrǵan daǵdarys ekonomıkanyń damýyna keri áser etpeýi kerek. Biz kerisinshe, óz ónimderimizdi shyǵarýǵa kúsh salyp, «Qarapaıym zattardyń ekonomıkasy» baǵdarlamasyn iske asyrýymyz kerek. Bul iske elimizde bir trıllıon teńge qarastyrylǵan», - dedi ol.
Sonymen qatar ol aýdan ákimderi men oblys qurylymdarynyń basshylaryna IJО́-niń ósimin jyl qorytyndysy boıynsha 4 paıyzdan tómendetpeý kerektigi týraly mindet qoıatynyn aıtty.
Soltústik Qazaqstan oblysy