Mádenıet basqarmasynyń basshysy Erlan Qalmaqovtyń bastamasymen qolǵa alynǵan ıgi joba úıde otyrǵan kópshilikke túrli salada jemisti eńbek etip júrgen Tobyl-Torǵaı óńiriniń talantty perzentterimen Instagram áleýmettik jelisinde onlaın baılanys arqyly emen-jarqyn áńgime dúken qurýǵa múmkindik beredi.
Jobanyń alǵashqy qonaǵy – kúmis kómeı ánshi Súndet Baıǵojın.
«Qadirli dostar! Aptanyń alǵashqy kúnin jańa onlaın jobamen bastaǵaly otyrmyz! Buǵan deıin habarlaǵanymyzdaı, Qostanaı oblysynda dúnıege kelip, búginde esimi elge tanylǵan óner qaıratkerleri men zııaly qaýym ókilderimen bolatyn suhbattar serııasyna «Sálem, saǵan, týǵan el» degen ortaq ataý berdik. Keshki efırde shyǵatyn basqa da jobalardyń bolýyna baılanysty, ári karantınde otyrǵan kópshilikke kúndiz de tushymdy dúnıeler usyný maqsatynda bastapqyda suhbattarymyzdy kúndizgi ýaqytqa josparlap otyrmyz.
Sizderdiń ótinishterińizge baılanysty, alǵashqy kezdesýimizdi Qazaqstannyń eńbek sińirgen qaıratkeri, Memlekettik syılyqtyń ıegeri, «Qurmet» ordeniniń kavaleri, Tuńǵysh Prezıdent-Elbasy qory syılyǵynyń laýreaty Súndet Baıǵojınmen @sundetbaigozhin ótkizetin bolamyz. Búgin saǵ. 16.00-de tikeleı efırge qosylyp, jerlesimizben júzdesýge asyǵyńyzdar!» - degen úndeý tastady Facebook paraqshasynda Erlan Qalmaqov.
Qostanaı oblysy