Búgin Qostanaı oblysynyń ákimi Arhımed Muhambetovtyń qatysýymen ótken selektorlyq keńes barysynda «Aýyl – El besigi» jobasyn júzege asyrý máselesi qaraldy. Jıyn barysynda ekonomıka jáne bıýdjettik josparlaý basqarmasynyń basshysy Gúlbaram Musaǵazına baıandama jasady.
Basqarma basshysynyń aıtýynsha, bıyl «Aýyl – El besigi» jobasy aýyl turǵyndarynyń ómir súrý sapasyn jaqsartýǵa, aýyldaǵy áleýmettik ortany jańǵyrtýǵa baǵyttalǵan.
- 2020 jyly 13 aýylda 63 joba júzege asyrylady. Bul jobalar Obaǵan, Denısov, Qamysty, Torǵaı, Amangeldi, Qaramendi, Uzynkól sııaqty 7 aýdan ortalyǵyn qamtıdy. Buǵan Meńdiqara aýdanynyń Pervomaı, Qostanaı aýdanynyń Oktıabr jáne Shemınov, Altynsarın aýdanynyń Sılantev, Denısov aýdanynyń Antonov, Beıimbet Maılın aýdanynyń Tobyl aýyldary da kirip otyr. Atalǵan aýyldardaǵy turǵyndardyń jalpy sany - 47,6 myń adam, dedi Musaǵazına.
Sonymen qatar 2 mlrd 38 mln teńge qarjyǵa qurylys jáne qaıta qalpyna keltirý jumystary boıynsha 6 joba josparlanǵan. Bıyl Altynsarın jáne Qamysty aýdandarynda eki stadıon qalpyna keltiriledi. Qarameńdi aýylynda eki ortalyq qazandyq, Denısov aýylynda balabaqsha salynady. Al Torǵaı jáne Uzynkól aýyldarynda eki sporttyq-saýyqtyrý ortalyǵynyń qurylysy bastalady.
Gúlbaram Musaǵazına óz baıandamasynda quny 1 mlrd 759 mln teńge bolatyn 7 joba boıynsha kúrdeli jóndeý júrgizý jumystary josparlanǵanyn atap ótti. Aıtýynsha, Qamysty jáne Torǵaı aýyldarynda aýdandyq aýrýhanalar, Beıimbet Maılın aýdanyna qarasty Tobyl kentinde dárigerlik ambýlatorııa kúrdeli jóndeýden ótedi. Sondaı-aq Amangeldi aýylynda A. Boranbaev atyndaǵy orta mektep, Qostanaı aýdanynyń Oktıabr jáne Meńdiqara aýdanynyń Pervomaı aýyldaryndaǵy orta mektepter, Denısov aýylyndaǵy mádenıet úıiniń ǵımaraty kúrdeli jóndeýden ótedi.
Basqarma basshysy aýyl ishindegi joldardy ortasha jóndeýge baǵyttalǵan 50 joba júzege asyrylatynyn aıtty.
Qostanaı oblysy