Bilim jáne ǵylym mınıstrligi emtıhandardy tapsyrý men dıplomdyq jumystardy qorǵaý boıynsha ádistemelik usynystar ázirledi. Onyń algorıtmi zańnama talaptaryna, BǴM-niń qashyqtan oqytýdy uıymdastyrý jónindegi buıryǵyna (2020 jylǵy 1 sáýirdegi № 123), sondaı-aq IýNESKO-nyń usynystaryna negizdelgen.
Búgin vedomstvonyń Facebook-tegi resmı paraqshasyndaǵy tikeleı efırde Bilim jáne ǵylym vıse-mınıstri Mıras Dáýlenov JOO rektorlarymen birge qashyqtan bilim berý jaǵdaıynda emtıhandar men dıplomdyq jumystardy qorǵaý qalaı ótetinin túsindirdi.
Vıse-mınıstr Mıras Dáýlenov emtıhandarǵa qatysty stýdentterdi eki sanatqa bólý qajet ekenin aıtty, olar - 1,2,3-kýrs stýdentteri jáne bıyl oqýyn támamdaıtyn túlekter.
Stýdentterdiń birinshi sanatyna qatysty qıyndyq joq, olar sessııalaryn tapsyrady. Onyń 3 joly usynylýda:1. Emtıhandy qashyqtan tapsyrý formaty;2. Pán boıynsha baǵany aǵymdaǵy baǵalarynyń negizinde qoıý;3. «I» (Incomplete) baǵasyn qoıý arqyly emtıhan tapsyrý merzimin shegerý. Bul stýdentterge emtıhandy keıin tapsyrýǵa múmkindik beredi jáne olardy oqýdan shyǵarýdan qorǵaıdy.Naqty sheshimdi árbir JOO akademııalyq derbestigi aıasynda ózi qabyldaıdy.
Búgingi kúni stýdentterdiń qashyqtan oqytý formatynda oryndaǵan jumystaryna 1,15 mln. baǵa qoıylǵanyn atap ótken jón.
Stýdentterdiń ekinshi sanaty – sońǵy kýrs stýdentteri. Eger karantındik shekteýler alynbasa, onda dıplomdyq jumystar qashyqtan qorǵalady. Aıta keterligi, stýdentter dıplomdyq jumystaryn aqpan-naýryz aılarynda aldyn-ala qorǵaǵan bolatyn, ıaǵnı negizgi jumys atqaryldy.
Keshendi emtıhanǵa keletin bolsaq, munda árbir JOO úsh nusqanyń birin qoldanady:1. Keshendi emtıhandy qashyqtan tapsyrý formatynda ótkizý;2. Jıyntyq baǵany bazalyq pánder boıynsha baǵalarynyń negizinde qoıý; 3. Keshendi emtıhandy keshirek merzimge aýystyrý (jazǵa nemese kúzge).Osylaısha, JOO mınıstrlik tarapynan ruqsat almaı-aq, jıyntyq baǵany bazalyq pánder boıynsha baǵalarynyń negizinde qoıý arqyly keshendi emtıhandardy ótkizbeý týraly sheshim qabyldaı alady.
Esterińizge sala ketsek, 2018 jyly Qazaqstannyń joǵary oqý oryndary akademııalyq derbestik aldy, soǵan baılanysty júrgizilip jatqan jumystar zańnamaǵa tolyq sáıkes keledi.
«Búgin biz emtıhan tapsyrý jáne dıplomdyq jumystardy qorǵaý algorıtmin talqyladyq. MJMBS-na sáıkes, JOO-y emtıhan ótkizý túrlerin óz betinshe anyqtaıdy. Degenmen, qashyqtan oqytý jaǵdaıynda Mınıstrlik tarapynan ádisnamalyq qoldaý kórsetý qajettiligi týyndaıdy. Ol úshin biz barlyq joǵary oqý oryndarymen aldyn ala talqylanǵan algorıtmdi ázirledik», - dedi QR Bilim jáne ǵylym vıse-mınıstri Mıras Dáýlenov.Bıyl 604 345 stýdent emtıhan tapsyrady, onyń 142 435-i qorytyndy attestattaýǵa kirisetinin atap ótemiz. 2020 jylǵy 16 naýryzdan bastap azamattyq JOO qashyqtan oqytýǵa kóshti. Dárister men semınarlar MS Teams, Meet by Google Hangouts, Zoom jáne basqa da servısterdiń kómegimen onlaın rejıminde ótkizilip jatyr, al stýdentterdiń tapsyrmalary Canvas, Moodle, Univer jáne Platonus platformalarynda oryndalýda. Tikeleı efırge UIB Ýnıversıtetiniń Prezıdenti Darhan Ahmed-Zákı, Narhoz rektory Endrıý Vahtel, Yessenov University-niń rektory Berik Ahmetov, QazUÝ oqý isi jónindegi prorektory Asqar Hıkmetov, Almaty qalasyndaǵy IýNESKO Klasterlik bıýrosynyń bilim berý baǵdarlamasy boıynsha Ulttyq mamany Meıirgúl Alpysbaeva, «Atameken» UKP Basqarma Tóraǵasynyń orynbasary Oljas Ordabaev, «ADAL BILIM» jobalyq keńsesiniń ákimshisi Sergeı Pen jáne «Qazaqstan stýdenteriniń alıansy» Respýblıkalyq stýdentter qozǵalysynyń Prezıdenti Ilııas Tústikbaev qatysyp, túsindirý jumystaryn júrgizdi.