Áleýmettik jelide tártip saqshylaryn balaǵattaǵan azamat jaýapqa tartyldy. Bul týraly Almaty qalalyq polısııa departamentiniń ókilderi habarlady. Er adam óz áreketi úshin jurttan keshirim de suraǵan.
«Men Qazaqstan Respýblıkasynyń barlyq azamattarynan jáne polısııa qyzmetkerlerinen keshirim suraımyn. Sizderden meni túsinip, keshirgenderińizdi qalaımyn. Men QR zańnamasynda kórsetilgendeı zań aldynda tolyq jaýap berýge daıynmyn», – dedi ol.
«Júrgizilgen monıtorıng barysynda azamattyń polısııa qyzmetkerlerin qorlaý faktisi anyqtaldy. Ol óziniń Instagram paraqshasynda tártip saqshylaryna arnalǵan bylapyt sózderi bar monologyn jarııalaǵan. Birneshe ret kameraǵa jaǵymsyz sóz aıtqan. Bul jigit QR Qylmystyq kodeksiniń 378-babymen bılik ókilin qorlaǵany úshin jazalanady. Bul fakt sotqa deıingi tergeýdiń biryńǵaı reestrine tirkelgen. Qylmystyq isti PD tergeý basqarmasy júrgizedi. Búgin ol qamaýǵa alynyp, qylmystyq jaýapkershilikke tartyldy», – dedi Almaty qalalyq Polısııa departamenti basshysynyń orynbasary Rýstam Abdrahmanov.