Stasıonardaǵy naýqastar barlyq talaptarǵa saı em-domdar qabyldaýda. Olarmen qatynasý qatań baqylaýǵa alynǵan. Jýyrda ókpeni jasandy jolmen tazalaıtyn jetildirilgen bes apparat jetkizildi. Qazir óńirde osyndaı 10 apparat bar.
Infeksııamen kúresip jatqan úsh dáriger, tórt medbıke, bes sanıtar aıryqsha jaǵdaıda qorǵalǵan. Aýysymnan shyqqan brıgada músheleri tegis dezınfeksııalanyp, eshkimmen baılanysqa túspeı ózderi ǵana turatyn «Altyn Orda» qonaqúıine arnaýly kólikpen jetkiziledi. Osy jerde as-aýqaty da syrttan berilip, eshkimmen aralastyrylmaıdy. Belsendi qoǵamdyq uıymdar olarǵa bir rettik kıim, taǵy biri barynsha dámdi taǵam daıyndap berýdi moıyndaryna alǵan. Úı-ishi, bala-shaǵalarymen tek telefon arqyly habarlasady. Keıbir oblystarda qosymsha aqy tóleý týraly sheshimniń endi ǵana qabyldanyp jatqanyn estımiz. Al bizdiń dárigerler naýryz aıyndaǵy qosymsha aqy – 825 myń teńgeni tegis alǵan. Árıne, yntalandyrýdyń eń zory osy ekeni sózsiz.
Qala kóshelerine shyqsańyz júrginshi múlde az. Ana jer, myna jerde qarań-qurań adamdardy kezdestiresiz. Oblys basshylyǵy efırge jıi shyǵyp, turǵyndarǵa karantın talabyn saqtaýdy aıtyp otyrady.
Kóshelerdi KamAZ-dar jarysa dezınfeksııalap júr. Qalaı desek te karantınniń talaptary qatań saqtalǵan. Joǵarydaǵy jetistik osyndaı jiti isterdiń nátıjesi. Alla da «saqtansań – saqtaımyn» degen ǵoı. Karantınniń talabyn «uzyn arqan, keń tusaýǵa» salmaı, tym bolmasa osy synaq kúnderi qatań saqtaıtyn bolsaq, indetti jeńemiz.
Soltústik Qazaqstan oblysy