Qajymuqan aýylyndaǵy «Zerendi» eshki sharýashylyǵy tutynýshylarǵa tabıǵı taza sút ónimderin usynyp keledi. Elordanyń irgesinde ornalasqan kásiporyn karantın rejımine baılanysty jumys tártibin ózgertýge májbúr.
«Zerendi» eshki fermasy jumysyn toqtatqan joq. Asyl tuqymdy maldyń súti kúrdeli tehnologııalyq jeli arqyly óńdeledi. Qazir, kásiporynda jumysshylardyń deni qysqartylǵan. Bul jaı ferma ónimin saýdalaý naryǵynyń tarylýyna baılanysty. Qazir daıyn ónim tek elordaǵa ǵana jetkizilýde. Buǵan deıin, eshki sútinen ázirlengen ónimder Nur-Sultan qalasymen qatar, Almaty, Kókshetaý, Qaraǵandy, Jezqazǵan, Qostanaı qalalarynda da saýdalanatyn edi. Kásiporynda jem-shóp ázirleý zaýyty men mal azyǵynyń jetkilikti qory bar.
– Kásiporyn qazirdiń ózinde eleýli shyǵyn kórip otyr. Biz bul shyǵyndardyń áserin bıyl da, keler jyly da sezinetin bolamyz. Aýyl sharýashylyǵynda belgili bir merzimdegi utymdy uıymdastyrylǵan jumys bútin bir jyldyń ónimdiligine áser etedi. О́kinishke qaraı, bıylǵy kóktemniń qıyndyqtarynan kelgen shyǵyn kólemi ondaǵan mıllıon teńgeni quraıdy, – deıdi Zerendi asyl tuqymdy eshki sharýashylyǵy jobasynyń jetekshisi Azamat Turmaǵambetov.
Ferma elordanyń azyq-túlik beldeýine engen. Kásiporyn áleýmettik mańyzy bar nysandardy shıpaly aq taǵammen qamtamasyz etip keledi. Sondaı-aq óńir turǵyndary Shekshek ata túliginiń sútin jas sábılerdi tamaqtandyrýǵa jıi qoldanady.
Aýyl sharýashylyǵy nysanynyń kórkeıýine aýyl turǵyndary aıanbaı eńbek etti, janyn saldy. Sharýalar fermanyń bolashaǵyna senimmen qaraıdy.
– Kásip bastaýyma úlken qoldaý bildirgen jubaıyma alǵys bildiremin. Ol bıznesti qalyptastyrýǵa, damytýǵa úlken úles qosty. Biz barlyq qıyndyqtardy birge jeńdik. Qazirgi jaǵdaıda da birlesip sheshim tabatynymyzǵa senemin, – deıdi Zerendi asyl tuqymdy eshki sharýashylyǵy jobasynyń jetekshisi Azamat Turmaǵambetov.
Asyl tuqymdy eshki sharýashylyǵynyń óndiris kólemi azaıǵan. Alaıda, sharýalar tyǵyryqtan shyǵar jol izdep, saqtaý merzimi uzaq ónimderge basymdyq berip otyr. Tapsyrystardy belgilengen merzimde oryndap, tutynýshynyń senimin joǵaltpaýdy da umyt qaldyrmaǵan. Qazir, kásiporyn balmuzdaq óndirisin qolǵa alǵan. Budan bólek, maı, súzbe, irimshik pen qurt ta óndiriledi. О́ndiris shyǵyndarynyń artýyna qaramastan, bul synnan súrinbeýimiz kerek, – deıdi óz isin súıgen sharýalar.