Shahmattan júlde qory 250 myń AQSh dollaryn quraǵan «Magnus Carlsen Invitational» degen ataýmen onlaın-týrnır jalǵasýda.
Úshinshi týrda kósh basynda kele jatqan qos oıynshy – norvegııalyq Magnýs Karlsen men amerıkalyq Fabıano Karýana kezdesti. Bul básekede 3:1 esebimen Skandınavııa túbeginiń túlegi jeńiske jetti. Kelesi kezdesý AQSh-tyń taǵy bir ókili Hıkarý Nakamýra men Álıreza Fırýdja arasynda ótip, alǵashqysynyń mereıi ústem boldy – 3,5:0,5. Endi sanaýly saǵattardan keıin Maksım Vashe-Lagrav (Fransııa) men Dın Lıjen (Qytaı) jáne Iаn Nepomnıashıı (Reseı) men Anısh Gırı (Nıderland) sheberlik baıqasady.
Basty básekelesinen basym túsken Magnýs Karlsen jarys kestesinde jeke-dara kósh bastady. Onyń enshisinde 8 upaı bar. Hıkarý Nakamýra ekinshi orynǵa kóterildi. Ol 7 upaıdy oljalap otyr.
Esterińizge sala keteıik, ekinshi týrda Magnýs Karlsen Álıreza Fırýdjıden, al Hıkarý Nakamýra Anısha Gırıden basym tústi. Bul kezdesýlerdiń ekeýinde de 2,5:1,5 esebi tirkeldi. Iаn Nepomnıashıı Maksım Vashe-Lavgravty 3:2 esebimen utty. Fabıano Karýana men qytaılyq Lıjen Dın arasyndaǵy tartysta dál sondaı eseppen alǵashqysynyń paıdasyna sheshildi.