Bul kúnderi «Vashıngton Kepıtalz» klýbynda óner kórsetip júrgen Reseıdiń dańqty hokkeıshisi Aleksandr Ovechkın Olımpııa oıyndarynyń altyn tuǵyryna kóterilýdi armandaıdy.
Aıtýly shabýylshynyń sporttyq ǵumyrynda jarqyn jeńister az bolǵan joq. Máskeýdiń «Dınamo» klýbynyń túlegi 2005 jyly muhıt asyp, «Vashıngton Kepıtalz» klýbynyń jeıdesin kıdi. AQSh-qa kelgen jyly-aq Ovechkın eń úzdik debıýtantqa tabystalatyn «Kolder Trofı» júldesin ıelendi. Segiz ret eń mergen shabýylshy jáne úsh ret eń qundy oıynshy atandy. UHL-dyń «Juldyzdar matchynda» jeti ret óner kórsetti. 2009 jyly UHL-dyń sońǵy onjyldyǵyndaǵy eń úzdik hokkeıshiler tizimine endi. UHL tarıhyndaǵy 100 dańqty oıynshylar qataryna oryn tepti.
Reseıdiń quramasyna 17 jasynda qabyldanǵan Aleksandr Ovechkın aıtýly memlekettiń namysyn qorǵaǵan jáne gol soqqan eń jas hokkeıshi retinde tarıhta qaldy. Ulttyq komananyń sapynda ol úsh dúrkin álem chempıony, eki dúrkin kúmis jáne tórt dúrkin qola júldeger atandy. Osyndaı ataq dańqy bola tura Ovechkın Olımpıada tuǵyryna áli birde-bir ret kóterilgen emes. Endi ol sol olqylyqtyń ornyn toltyrǵasy keletinin málimdedi.
- Olımpııa oıyndarynda top jarýdy bala kezimnen armandaǵanmyn. Alaıda osy jospardy júzege asyrýdyń reti bir kelmegen edi. Endi sol olqylyqtyń ornyn toltyrýdy maqsat tutyp otyrmyn, - deıdi dańqty hokkeıshi.