Qazaqstan azamaty Ońtústik Koreıada 10 adamdy órtten qutqaryp, jergilikti halyqtyń ystyq yqylasyna bólendi.
The Korea Times gazetiniń habarlaýynsha, oqıǵa osydan bir aı buryn, ıaǵnı 2020 jyldyń 23 naýryzynda Gangýon provınsııasyndaǵy Iаngıang qalashyǵynda bolǵan eken. Álıakbar Iýldashev esimdi otandasymyz tún ortasyna qaraı úıine oralǵanda tútin ıisin sezedi. Páterlerdiń birinde órt shyqqanyn túsingen ol «órt, órt» dep aıqaı salyp, ǵımarattaǵy turǵyndardy oıatady.
Qarbalasyp júrgende kómek surap aıǵaılaǵan áıeldiń daýsyn estigen, biraq páterdiń esigin asha almapty. Álıakbar kóp oılanbastan páterge gaz qubyry jáne kabel arqyly órmelep, páterge kirip, áıeldi alyp shyǵypty. Sondaı-aq ǵımaratta bolǵan taǵy 10 adamdy tilsiz jaýdyń tyrnaǵynan aman alyp qalǵan. О́kinishke qaraı, órt shyqqan páterde bolǵan áıel keıinnen aýrýhanada kóz jumady.
Al Álıakbar moınyn, arqasyn jáne bilegin otqa kúıdirip alǵan. Qazaqstandyq jigit erligi týraly da, órt kezinde denesin kúıik shalǵany týraly da týystaryna tis jarmapty. Medısınalyq kómekten de bas tartqan. Alaıda kórshileri boı bermeı, ony aýrýhanaǵa jetkizip, emge ketetin shyǵyndy ózderi tólepti.
«Men týraly habar gazette, ınternette, feısbýkte shyqqannan keıin úıdegiler ony kórip, anam jylap jiberedi. Ol bilmeıtin edi. Kórdi. Qolym, qulaǵym, moınym dákemen oralǵan. Jumysta ondaı-ondaı bolady, qulap tústim dedim», deıdi Álıakbar «Habar24» arnasyna bergen suhbatynda.
Álıakbar Ońtústik Koreıanyń Iаngıang qalashyǵyna 2017 jyly týrıstik vızamen barǵan. Negizgi maqsaty jumys isteý bolǵan ol sol elde qalyp qoıady. Sóıtip, qujatsyz jumys istegen.
Onyń zańsyz júrgeni anyqtalǵan soń, el úkimeti Álıakbardy 1 mamyrǵa deıin Qazaqstanǵa deportasııalamaq. Alaıda Ońtústik Koreıa turǵyndary buǵan kelispeıtinin, kerisinshe Álıakbardyń zańdy jumys isteýine ruqsat etip, syılyq berý qajet ekenin aıtyp onlaın petısııa jarııalaǵan. Qazirgi tańda oǵan qol qoıǵandar sany 10 myńnan asyp jyǵylady.
Iаngıang aýdany ákimshiliginiń aıtýynsha, Álıakbarǵa zańdy jumys isteýge ruqsat berý máselesi qazirgi tańda qaralyp jatyr. Bul másele Ońtústik Koreıanyń Densaýlyq saqtaý mınıstrliginiń nazarynda. Alda-jalda atalǵan vedomstvo qoldap jatsa, Álıakbar Ońtústik Koreıada turaqty turýǵa ruqsat alýy múmkin.
Korea JoongAng Daily saıtynyń málimetine súıensek, Álıakbardyń erligin eskergen LG Welfare qory oǵan «Gýmanıtarlyq syılyǵyn» tabys etken.