«Sen ekeýimizdiń qanymyz bir». Dál osyndaı ataýmen oblystyq qan ortalyǵy janashyrlyq aksııasyn jalǵastyrýda.
Ortalyqtyń arnaıy qan alatyn jyljymaly kóligi de bar. Bul joly ıgilikti sharaǵa oblystyq qylmystyq-atqarý júıesi departamentiniń qyzmetkerleri belsene at salysyp, 40-qa jýyq qyzmetkeri qan tapsyrdy.
Pandemııa saldarynan qan ortalyǵynda donorlar sany kúrt azaıyp ketip edi. Endi mine, oblystyq qylmystyq-atqarý júıesi departamentiniń qyzmetkerleri qan ortalyǵynyń qoryn tolyqtyrdy. Erikti túrde qan ótkizýge barlyq qyzmetkerler nıet bildirdi. Shara barysynda donorlar aldyn ala dáriger baqylaýynan ótip, densaýlyǵyn teksertti. Sol jerde qan toptaryn naqtylap, gemoglabın kórsetkishteri anyqtaldy.
Tótenshe jaǵdaı engizilgen sátten bastap birqatar izgi nıetti adamdar qan tapsyrýda. Bul ıgi bastama áli jalǵasyn tabady. Jyljymaly kólik qajetti qural-jabdyqtarmen tolyq qamtamasyz etilgen. Bir mezette eki adam qan tapsyra alady. Sharapaty mol sharaǵa jergilikti «Qyzyl jarty aı» qoǵamdyq uıymynyń eriktileri de úlken úles qosýda. Olar aq halatty abzal jandarmen birlesip, donorlar sanyn kóbeıtýde.
Qan ortalyǵy qyzmetkerleriniń aıtýynsha, qan birinshi kezekte kúrdeli onkologııalyq aýrýlarmen aýyratyn balalarǵa, perzentti bolǵan áıelderge, sondaı-aq, jol-kólik oqıǵalarynan zardap shekkenderge qajet.
Kókshetaý qalasy