Almaty qalasy aýmaǵyn zararsyndandyrýdyń toǵyzynshy kezeńi márege jetti. Karantın bastalǵaly mamandar ár kezeń saıyn 8 myń 500 úı men 23 myń kireberis jáne 4 myńnan astam aýlany dezınfeksııalaǵan.
Atalǵan kezeńniń qorytyndysy boıynsha 7 myńnan astam kireberis pen 1345 aýlaǵa júz paıyz dezınfeksııalyq jumystar júrgizildi. Oǵan 61 brıgada men 453 adam tartylyp, barlyǵy 79 300 lıtr daıyn suıyqtyq paıdalanylǵan. Al qoǵamdyq oryndar men kóshelerdi zalalsyzdandyrý úshin 150 arnaıy tehnıka men myńnan astam adam jumys istedi. Nátıjesinde 4 mıllıon 420 myń sharshy metr kóshe, 712 myń sharshy metr jaıaý júrginshiler joly, 985 konteıner men 201 konteıner aýmaǵy tolyq zalalsyzdandy. Bul úshin 817 myń lıtr vırýsqa qarsy daıyn suıyqtyq jumsalǵan.
Atqarylyp jatqan dezınfeksııalyq jumystardyń ishinde karantınge jabylǵan aýmaqtar da bar. Infeksııa oshaqtaryn arnaıy mamandar kúnine eki ret muqııat zalalsyzdandyryp shyǵady. Iske asyp jatqan jumystardyń barlyq shyǵyny qala ákimdiginiń bıýdjetinen bólinip otyr.
«Almaty qalasy ákimdigi aqsha bólip, dezınfeksııalaý jumystarynyń 9 kezeńin ótkizdik. Osynyń bári Almaty qalasy ákimdiginiń qarjysy esebinen júrgizilip otyrady. Al PIK burynnan klınıng kompanııalarmen shartqa otyrǵan. Olar aptasyna bir ret podezdi jýýy kerek», – dedi Almaty qalasy Turǵyn úı saıasaty basqarmasynyń ınspeksııa bóliminiń basshysy Jandos Qaıyrhanov.